Ditën e sotme është zhvilluar gjyqi për atentatin ndaj ish-prokurorit Arian Ndoja, ku dëshmoi i penduari i drejtësisë, Erion Alibej, një dëshmi e cila krijoi tension dhe debate të forta në sallën e gjyqit.
Lidhur me këtë e ftuar ditën e sotme në emisionin ‘Studio Live’ në Report Tv gazetarja Keti Banushi tha se dëshmitë e Erion Alibejt janë duke zbërthyer shumë ngjarje kriminale.
'Tek ‘Plumbi i Art’ Erion Alibej ka dhënë dëshmi dhe është pas Nuredin Dumanit që po zbërthen shumë ngjarje kriminale. Janë edhe vet personat në bankën e të akuzuarve që dëshminë e tij e nxjerrin si të pavlefshme. Avokatët bëjnë kërkesa që s’kanë lidhje me procesin që të mos të vijohet me dëshmitë e tyre sepse ata i kanë vënë përballë hekurave shumë persona. Sa i takon grupeve kriminale prokuroria e Posaçme i ka goditur dhe një ndihmës krahas bashkëpunëtorëve të drejtësisë i ka dhënë edhe SkyEcc.
Trafiku i drogës është një arsyet kryesore të armiqësi së mes këtyre grupeve, sepse kanë qenë miq dhe më pas janë prishur për trafikun e drogës. Në procesin e sotëm nuk del trafiku i drogës, por tokat në Gjirin e Lalëzit ose influenca që kishte Plarent Dervishi në portin e Durrësit që si pëlqente grupit tjetër kundërshtar, pra krahas trafikut të drogës janë pronësia dhe tokat në bregdet', tha ajo.
Teksa u ndal tek sekuestrimi i 4 mln euro pasuri në Itali të Suel Çelës, ajo tha se është rezultat i një hetimi të përbashkët mes SPAK dhe prokurorisë italiane të Veronës.
Banushi tha se Suel Çela dhe i vëllai kishin agjenci me 30 prona, ku përfshiheshin dyqane dhe banesa të cilat ishin dhënë me qira.
‘Janë të rralla sekuestrohet që bëhen jashtë vendit. Hetimet për pronat e Suel Çelës dhe të vëllait të tij, kanë qenë hetime të përbashkëta mes SPAK dhe prokurorisë italiane të Veronës. Ka pas dyshime që bëheshin transferta në një kompani në Itali në fushën e ndërtimit, ata kishin një agjenci me 30 prona ku kishin prona dyqane dhe banesa dhe nga dhënia me qira përfitonin shuma të mëdha parash. Janë vënë në sekuestro preventive nga gjykata e Veronës’, tha ajo.
Dosjen ‘Partizani’ Banushi e sheh si një dosje, procesi i të cilës do të marr shumë vite.
'Ka qenë dosja që ka pasur më shumë shtyrje dhe me këtë ritëm mund të kemi 4 ose 5 vite në gjykatën e shkallës së parë. Është lënë një seancë në datën 21 Korrik dhe mendoj se do të marr shumë kohë sepse nuk kanë kërkuar gjykim të shkurtuar dhe gjyqi zhvillohet me 3 seanca. Pra do të ketë kërkesa për dëshmitarë, Malltezi ka thënë se do kërkojë një listë të gjatë dëshmitarësh dhe do të jetë një proces që do të duhen vite’, tha ajo.
Komente
