Gezim Troka, 50 vjeç, i dënuar në Shqipëri për detyrimin e partneres së tij në prostitucion, vazhdon të jetojë i lirë në Mbretërinë e Bashkuar, edhe katër vjet pas dështimit të përpjekjes së ekstradimit. Ai u shpall fajtor në mungesë në vitin 2008 dhe u dënua me gjashtë vjet burg.
Edhe pse ishte në kërkim ndërkombëtar, Troka arriti të hynte në Britani me pasaportë të falsifikuar dhe u zbulua vetëm kur, dhjetë vjet më vonë, u dënua për sulm të thjeshtë. Kur ishte në paraburgim për deportim, autoritetet britanike kuptuan se ai ishte një i kërkuar ndërkombëtarisht dhe pranuan kërkesën për ekstradim të Shqipërisë. Apeli i tij i parë u refuzua, por ai e çoi çështjen në High Court, e cila hodhi poshtë kërkesën në dhjetor 2021. Megjithatë, Troka vazhdon të qëndrojë në Britani dhe autoritetet shqiptare po shqyrtojnë mundësinë e tërheqjes së kërkesës për ekstradim, që do të thotë se ai mund të qëndrojë aty përgjithmonë.
Historia kriminale e Trokës është e gjatë. Në vitin 1994, ai u lidh me një grua në Fier dhe, gjatë udhëtimit ilegal në Athinë, e detyroi atë me dhunë fizike dhe psikologjike të punonte në një bordello dhe i vodhi paratë. Më pas e ndoqi edhe në Romë dhe Padua, ku vazhdoi ta shfrytëzonte. Ai u arrestua në Itali në 1995 dhe u dënua me një vit e katër muaj burg për shfrytëzim dhe favorizim të prostitucionit, por vazhdoi aktivitetin e tij edhe më vonë.
Ekspertët shqiptarë të krimit tregojnë se në fund të viteve 1990, shqiptarët në Itali mësuan nga mafia italiane si kontrollohej prostitucioni rrugor dhe filluan të trafikonin vajza shqiptare për t’i detyruar në punë seksi, më pas duke shtrirë aktivitetin edhe në Britani.
Raste të ngjashme përfshijnë Roland Cankaj, i cili u dënua në Londër për drejtimin e një bordelloje me gra braziliane të trafikuara. Ai i detyronte të kryenin marrëdhënie me dhjetë deri në pesëmbëdhjetë burra në ditë, duke përfituar gjysmën e të ardhurave.
Tani, Troka është liruar pa kushte në Britani dhe mund të lëvizë i lirë, duke shqetësuar ekspertët e sigurisë dhe migracionit./ Daily Mail
Komente
