Policia e Durrësit ka arrestuar dy persona të cilët akuzohen për vepra të ndryshme penale. Njëri prej tyre mësohet se ishte shpallur më herët në kërkim.
Gjykata e Shkallës së Parë Durrës, e ka dënuar Emanuel Hasran me 4 muaj burg në vitin 2017 për veprën penale "Goditje për shkak të detyrës".
Burime bëjnë me dije se në prangat e policisë së Durrësit ka rënë edhe 20-vjeçari me inicialet R.R. Sipas Policisë, i riu ka dhunuar fizikisht dhe psikologjikisht bashkëjetuesen e tij.
Njoftimi i Policisë
Specialistët për Hetimin e Krimit në Komisariatin e Policisë Durrës ndaluan shtetasin në kërkim Emanuel Hasra, 26 vjeç, banues në Durrës, të cilin Gjykata e Shkallës së Parë Durrës, me vendimin e datës 23.10.2017, e ka dënuar me 4 muaj burgim, për veprën penale "Goditje për shkak të detyrës".
Specialistët për Hetimin e Krimit në Komisariatin e Policisë Shijak arrestuan në flagrancë shtetasin R. R., 20 vjeç, banues në fshatin Fllakë, Shijak, pasi ka ushtruar dhunë fizike dhe psikologjike ndaj bashkëjetueses së tij. Materialet i kaluan Prokurorisë, për veprime të mëtejshme.
