Fleta shqiptare e votimit për Parlamentin e ri do të fluturojë në 107 shtete të botës, duke mbuluar përmes postës cdo cep të globit.
KQZ mbylli mesnatën e së martës aplikimet online, duke grupuar shifrën totale të 294,155 zgjedhësve në diasporë që bënë kërkesë për regjistrim.
Mijëra shqiptarë përdorën orët e fundit për aplikime. E marta regjistroi mbi 13 mijë kërkesa të reja, ndërsa 53 persona ishin duke e bërë aplikimin në minutën e fundit kur sistemi u mbyll.
KQZ është duke shqyrtuar rreth 18 mijë kërkesat e fundit, ndërsa deri më tani, më shumë se 233 mijë votues nga jashtë janë pranuar, dhe 42 mijë të tjerë janë refuzuar.
58 % e aplikimeve vijnë nga votues burra, dhe 42 % nga gra.
Të rinjtë, mes tyre edhe zgjedhës për herë të parë, të moshës 18-25 vjec, kanë treguar interes të ulët. Shumë prej tyre mund të kenë lindur në emigracion e mund të mos kenë fare dokumente shqiptare.
Mosha mbi 56 vjec, zë vetëm 17 % të aplikimeve online, gjë që me gjasë lidhet me vështirësi që kjo moshë mund të ketë pasur me teknologjinë. 25-45 vjecarët kanë interesin më të lartë (52%).
Në masë dërrmuese, ata që janë regjistruar deri më tani, i përkasin qarkut Tiranë, me rreth 50 mijë votues që janë pranuar nga KQZ.
Pas tyre vjen Fieri me 31 mijë aplikime, dhe Durrësi më 24 mijë.
Regjistrime më të ulëta shënojnë qarqet, Dibër, Gjirokastër e Kukës. Qarku verilindor, shënon më pak se 4 mijë votues nga diaspora.
Peshën më të madhe të regjistrimeve e mbajën Italia dhe Greqia, të ndjekur nga Gjermania, ShBa dhe Anglia.
Në fillim të prillit, KQZ do të nisë shpërndarjen e fletëve të votimit në diasporës, duke gjetur zgjedhësit përmes postës, në adresën që kanë deklaruar.
Ata që janë regjistruar deri tani, mbulojnë të gjitha kontinentet dhe skajet më të largëta e të padëgjuara.
Komente
