Kombëtarja ka kryer sot ditën e katërt të përgatitjeve për ndeshjen miqësore kundër Spanjës për të cilën vihet re që ka një atmosferë mjaft pozitive. Ndër futbollistët rinj që janë bashkuar për herë të parë me kuqezinjtë është edhe mesfushori 20-vjeçar Kristjan Asllani që luan me Empolin në Seria A.
“Jam shumë i lumtur. Unë ekipin kombëtare e shihja në televizor dhe të jem këtu është kënaqësi shuëm e madhe për mu dhe shpresoj që të bëjmë mirë këto dy ndeshje,”-u shpreh Kristjan Asllani, futbollist i kombëtares.
Asllani në grumbullimin me kombëtaren foli edhe për interesin që Milan ka shfaqur për të.
“Unë nuk i kam shumë qejf këto zërat e merkatos. Unë mendoj vetëm për Empolin se kam 13 vite që luaj për këtë skuadër dhe shpresoj që të qëndroj në Seria A. Do bëj gjithçka për të ndihmuar skuadrën sepse është kënaqësi për mua që të luaj me Empolin,”-deklaroi Kristjan Asllani, futbollist i kombëtares.
Ndërkohë sulmuesi Giacomo Vrioni është rikthyer pas disa mungesave dhe është optimist edhe pse përballë Shqipërisë është një kundërshtar si Spanja.
“Ne do provojmë është normale. Në ndeshjen kundër Spanjës do të shohim se çfarë niveli jemi dhe kërkojmë një rezultat që të japim një kënaqësi për tifozët që do të vijnë në stadium,”-tha Giacomo Vrioni, futbollist i kombëtares.
Ndeshjen e së shtunës kundër Spanjës në Katalonjë do ta drejtojë një katërshe arbitrash nga Malta me kryesor Trustin Farruxha.
