TIRANË - Dinamo barazoi 1-1 kundër polakëve të Jagiellonias në sfidën e kthimit play-off të Conference League. Në ‘Air Albania’ ndeshja ishte e luftuar, por humbja e ekipit shqiptar 3-0 në ndeshjen e parë në Poloni rezultoi vendimtare. Kështu Dinamo duket të kënaqet me një paraqitje të mirë në rikthimin pas 15 vitesh në garat evropiane, pasi për këtë sezon është eliminuar.
Ndryshe nga një javë më parë, Dinamo tregoi ritëm të lartë loje, por planet e Ilir Dajës i prishi dëmtimi i Klevi Qefalisë, i cili i la vendin Qardakut pas vetëm 37 minutave lojë.
Megjithatë Dinamos ia doli të gjente epërsinë me Dejvi Bregun në minutën e 68-të. Një top i mbetur në zonë u shfrytëzua nga vlonjati që me të djathtë e ndali në rrjetë.
Festa e tifozëve dhe shanset e Dinamos për ta dërguar ndeshjen në shtesë u zbehën nga Rallis, i cili në minutën e 79-të barazoi për 1-1. Me këtë rezultat u mbyll e gjithë sfida dhe ‘Blutë’ janë jashtë Conference League.
Komente
