Disa orë pasi shpalli tarifat e reja doganore ndaj vendeve më të cilat SHBA ka marrëdhënie tregtare, presidenti Donald Trump shkruan metaforikisht në “Truth Social” se “operacioni përfundoi” dhe se “parashikimi është që pacienti do të bëhet më i fortë, më i madh”, duke sjellë në një formë tjetër deklaratat e bëra dje se Amerika është “mashtruar” nga të huajt për një kohë të gjatë, por kjo gjë ka përfunduar dhe se tashmë ka nisur rifuqizimi i saj.
“Operacioni përfundoi! Pacienti mbjetoi dhe po shërohet. Parashikimi është që pacienti do të bëhet më i fortë, më i madh, më i mirë dhe më i qëndrueshëm se kurrë më parë. Ta bëjmë Amerikën të madhe sërish!!!”,- shkruan republikani 78-vjeçar në rrjetin e tij social.
Për presidentin republikan, volumi i mallrave që SHBA-të importojnë nga vendet e tjera është shumë më i madh se volumi i mallrave amerikanë që eksportohen, dhe kjo diferencë është e padrejtë për kreun e Shtëpisë së Bardhë.
Tarifat ‘bazë’ prej 10% do të hyjnë në fuqi më 5 prill, ndërsa për vendet e konsideruara si "shkelësit më të mëdhenj" – 60 shtete që do të përballen me tarifa shtesë përveç atyre minimale – ato do të fillojnë nga 9 prilli.
Mark Carney
Kanadaja ka vendosur kundër-tarifa për automjetet ndaj SHBA-së, si përgjigje kjo e tarifave të vendosura nga Presidenti Trump një ditë më parë.
“Qeveria e Kanadasë do të përgjigjet duke përshtatur qasjen e SHBA-së me tarifa 25% për të gjitha automjetet e importuara nga Shtetet e Bashkuara që nuk janë në përputhje me CUSMA, marrëveshjen tonë të tregtisë së lirë të Amerikës së Veriut”, tha kryeministri kanadez Mark Carney.
Ato tarifa nuk do të ndikojnë në pjesët e makinave, tha ai, “sepse ne i dimë përfitimet e sistemit tonë të integruar të prodhimit”.
Presidenti francez Emmanuel Macron ka reaguar ashpër ndaj tarifave të vendosura nga Presidenti i SHBA-së, Donald Trump, duke i cilësuar ato si “brutale dhe të pabaza.”
Ai ka theksuar se këto masa kanë një ndikim të rëndësishëm në ekonominë franceze dhe atë evropiane, dhe ka kërkuar që të merren masa të duhura për të mbrojtur sektorët që preken nga këto tarifa.
Macron ka shprehur mbështetje për qëndrimin e Bashkimit Evropian, duke theksuar se “asgjë nuk mund të përjashtohet” në përgjigje të kësaj lëvizjeje dhe se të gjitha mjetet janë të hapura për t’u përdorur, përfshirë mundësinë e ndërhyrjes në sektorin e shërbimeve dixhitale, nga ku SHBA përfiton shumë nga tregu evropian.
Ai gjithashtu ka apeluar për një reagim të koordinuar të BE-së, duke theksuar se është e rëndësishme që Europa të qëndrojë e bashkuar dhe të reagojë si një bllok i vetëm ndaj politikave të Trump.
Në përpjekje për të mbrojtur ekonominë franceze, Macron ka sugjeruar se mund të shqyrtohen ndryshime në investimet franceze në SHBA derisa situata të sqarohet, dhe ka bërë thirrje që të mos lejohet që sektori francez të bëhet viktimë e këtyre tarifave të dëmshme.
Komente
