Në një sallë gjyqi, një punonjës social ka në duar një përgjegjësi të madhe. Për 39-vjeçarin, Bledi Loçi, pjesa më e rëndësishme e punës së tij është të vlerësojë sa më drejt kushtet e secilit prind që kërkon kujdestarinë e një fëmije pas një procesi divorci.
“Ne bëjmë intervistomë me të dyja palët në zyrë e më pas shohim edhe kushtet socio ekonomike nga të dyja palët në një proces divorci. Ne bëjmë edhe verifikimin e atyre që thonë në ambientet e shtëpisë, edhe duke parë edhe marrëdhëniet që kanë palët e treta më fëmijët dhe fëmijët me njëri tjetrin”, thotë Bledi Loçi- punonjës social në gjykatë
Përfshirja emocionale, sipas 39-vjecarit është e pashmangshme.
“Një nga sfidat kryesore është se ti mos futesh në konfidencialitet me palët, me klientët që je duke intervistuar. Është një nga çështjet që duhet të jemi shumë profesionistë për të mbajtur palët larg edhe të marrim informacionet që ne duam, për të siguruar vendimin për kujdestarin e fëmijës. Ne jemi mësuar që të kemi një lloj largimi nga çdolloj rasti edhe të kemi një vendim sa më profesional”, thotë ai.
Por, puna e punonjësve socialë nuk ndalet vetëm në gjykata. Ata janë të pranishëm kudo, nga spitalet te shtëpitë e të moshuarve, e deri te institucionet e kujdesit për fëmijët në nevojë.
"Profesionistët e punonjësve sociale mund të punojnë në të gjitha nivelet: -niveli micro, duke ofruar këshillim, duke ofruar menaxhim rastesh. -niveli mezo duke punuar brenda institucioneve dhe niveli -macro, përmes hartimit të politikave sociale që adresojnë nevojat sociale”, thotë për Report Tv, Elona Dhëmbo, pedagoge në Fakultetin e Shkencave Sociale.
Rexhina Marku, menaxhere e projekteve në një OJF që punon për angazhimin e të rinjve në punë tregon sfidat që kalojnë punonjësit socialë në terren.
“Sfidat e punonjësve socialë janë të shumta. Mund të fillojë që nga aplikimi për punë, që nga puna me grupe të ndryshme, të cilat kanë interesa të ndryshme. Duhet të jesh shumë fleksibël në ketë lloj profesioni. Pasi nuk ke të njëjtën qasje kur punon më fëmijët, kur punon me gra dhe të rinjtë. Ti duhet të adaptohesh me grupin se ti po punon”, thotë Rexhina Marku, Qendra për Zhvillim Komunitar.
18 marsi, është Dita Botërore e Punës Sociale, një profesion jetik që ndikon drejtpërdrejt në mirëqenien e grupeve më të ndjeshme të shoqërisë
Komente
