TIRANE-Në ditën e dytë të vizitës në Shqipëri, Presidenti i Parlamentit Europian David Sassoli sot takoi kryetarin e PD-së, Lulzim Basha dhe Klajda Gjoshën nga LSI-ja në selinë e blu, pasi Monika Kryemadhi ndodhet në SHBA. Lideri demokrat u shpreh se Partia Demokratike dhe Opozita e Bashkuar po bën gjithçka që hapja e negociatave me Bashkimin Europian të bëhet realitet sa më parë.
"I lumtur të takoja mikun e Shqipërisë, Presidentin e Parlamentit Europian z. David Sassoli dhe të merrja prej tij konfirmimin se, personalisht dhe institucionalisht, do të jetë një mbështetje e fuqishme dhe e vazhdueshme për rrugën europiane të Shqipërisë dhe përparimin demokratik të vendit tonë. I konfirmova se Partia Demokratike dhe Opozita e Bashkuar po bën gjithçka që aspirata e qytetarëve shqiptarë për hapjen e negociatave me Bashkimin Europian të bëhet realitet sa më parë. Bashkimi Europian dhe respektimi i vlerave europiane është e ardhmja e vetme e Shqipërisë, pavarësisht krizës që vendi po kalon! Mirënjohje Presidentit Sassoli dhe Parlamentit Europian për mesazhin shpresëdhënës se populli shqiptar ka patur dhe do të ketë gjithmonë mbështetjen e Europës" është shprehur Basha, sipas njoftimit të zyrës së shtypit të PD-së, pasi vetë nuk pranoi që të fliste për mediat duke thënë vetëm që "ka qenë një ditë e ngjeshur takimesh" para se të priste ambasadoren e re amerikane në selinë e PD-së.
Ditën e djeshme Sassoli takoi Presidentin Ilir Meta, kryeministrin Edi Rama, kryetarin e Kuvendit Gramoz Ruçi dhe kryetarët e Grupeve Parlamentare, teksa mbajti edhe një fjalim përpara deputetëve. Në qendër të bisedës dje por edhe sot me liderin e opozitës ishte cështja e negociatave me shpresën se në mars do të ketë një dritë të gjelbër për Shqipërinë pas refuzimit të tetorit. Ai tha dje se BE-ja s'i tha 'JO' Shqipërisë, por vendimi u shty, ndërsa vlerësoi aksionin anti-KÇK-së.
Komente
