Rei është 21 vjeç dhe vuan nga çrregullimet e autizmit, por kjo nuk e ka penguar të ndjekë pasionet. Ai mundohet të shijojë çdo moment të jetës se tij me një energji që frymëzon këdo.
“Di të bëj sport, të notoj, pikturë edhe valle”, thotë ai.
Ai është ende në klasën e tetë dhe shkolla i pëlqen shumë. Përveç mësimeve, atje gjen shokë me të cilët ndan gëzimet e përditshme.
“Unë shkoj në shkollë”
Pyetje: “Te pëlqejnë detyrat?”
Rei: Po
Pyetje: Po shokë ke atje?
Rei: Po. Dilaveri, Pranvera, Rajmonda, Serjani edhe Kadriu
Edhe Arditi 28 vjeç vuan nga çrregullimet e spektrit të autizmit. Ëndrra e tij është e madhe: Të bëhet mjek për fëmijët ndërsa thotë se ndihet i dashuruar.
“Unë dua të bëhem doktor të vizitoj fëmijët. Nusja ime Katerina. Bjonde. Shoqja ime, e dua shumë”, thotë ai.
Në këtë rrugëtim sfidues, familjet që rrisin fëmijë në spektrin autik përballen me sfida të mëdha, por një gjë i “zeron” të gjitha dashuria pa kushte.
“Në teori, normalisht, është tepër e vështirë për një komunitet të caktuar apo për personazhe të caktuar ta kuptojnë, por ata që e përjetojnë në përditshmëri qoftë një nënë, qoftë një baba, qoftë një familje e dinë më së miri se çfarë do të thotë të kesh një fëmijë me spektrin e autizmit. Unë jam punonjëse dhe, normalisht, ka shumë vështirësi, por edhe shumë dashuri njëkohësisht. Balancohen të dyja. Mesazhi im është që jo vetëm më 2 prill t’i duam, por çdo ditë t’i duam dhe të mos i diskriminojmë”, tha psikologia Marsela Lekli.
Në Ditën Botërore të Ndërgjegjësimit për Autizmin, punonjësit sociale thonë se historitë e suksesit të personave me spektrin autik janë një shtysë për të vazhduar punën e tyre të palodhur. Irena Mucaj, punonjëse sociale në qendrën e Fëmijëve me Aftësi Ndryshe në Fier, thotë se nuk janë të pakta rastet e punësimit të tyre.
Në vendin tonë nuk ka shifra të sakta dhe as një regjistër zyrtar për këtë çrregullim. Mirëpo referuar Ministrisë së Shëndetësisë, rreth 26% e fëmijëve me aftësi ndryshe janë me autizëm.
Komente
