Ka vite që në Bashkinë Shkodër flitet për mungesë fondesh, mungesa të cilat detyrimisht janë përkthyer në mungesë investimesh për bashkinë më të madhe në veri të vendit, por asnjëherë nuk është folur për të ardhura që ky institucion mund t'i kishte shtuar në arkën e të ardhurave.
Report Tv dhe Shqiptarja.com kanë siguruar një dokument që flet qartë për një “gropë” të madhe të të ardhurave të bashkisë Shkodër nga mos vjelja e detyrimeve ndër vite.
Në bazë të shkresës, Bashkisë Shkodër, i mungojnë mbi 1 miliard lekë kjo e përllogaritur nga viti 2006-2022, për detyrime të papaguara ndaj Bashkisë Shkodër.
Një shifër e konsiderueshme që flet qartë edhe për mungesën e vëmendjes nga ky institucion për të mbledhur të ardhurat e veta të cilat përkthehn në investime për qytetarët. Mos vjelja e gjobave të IMT, është zëri më shumën më të madhe në “gropën” e të ardhurave nga bashkia e Shkodrës me 453,707,472 lekë, e cila pasohet më pas me detyrimet në infrastrukturë 254,935,580, për të vijuar me Tarifë pastrami 128,540,569 lekë dhe Sekuestrime me 183,640,028 lekë.
1 miliard lekë, apo 10 Miliard lekë të vjetra, e përkthyer në investime sa 6 kontrata të rrugës së Dukagjinit. Shifër kjo që Shkodrës do ti kishin bërë punë për shumë nevoja që ky qytet apo njësitë administrative kanë dhe përballë tezës së mungesës së parave duket se është hendeku më i madh I krijuar gjatë drejtimit të Bashkisë Shkodër në vite!
