Republikanët janë zotuar të përmbushin rolin e Kongresit për mbikëqyrjen e Shtëpisë së Bardhë.
“Nuk mendoj se ka ndonjë amerikan që beson se drejtësia nuk duhet të jetë e barabartë për të gjithë. Nga kjo administratë kemi parë se çfarë ka ndodhur para zgjedhjeve, çfarë kanë bërë ata ... për të tentuar të falsifikojnë, ata përpiqen të kenë standarde të ndryshme për bindjet e tyre. Kjo nuk funksionon në Amerikë”, tha kryetari i Dhomës së Përfaqësuesve, Kevin McCarthy.
Republikanët argumentojnë se administrata Biden ka abuzuar me pushtetin e saj; që nga mënyra se si e ka trajtuar emigracionin masiv në kufirin jugor të Amerikës….
“Muaj pas muaji ne kemi vendosur rekorde për emigrantët që vijnë në vend. Dhe sinqerisht, mendoj se është e qëllimshme. Nuk e di se si dikush me logjikë të shëndoshë mund të arrijë në ndonjë përfundim tjetër. Duket e qëllimshme. Duket e paramenduar”, tha ligjvënësi republikan Jim Jordan.
...e deri tek përdorimi i qeverisë federale për qëllime politike…
“Ne do ta kthejmë këtë komision tek misioni i tij kryesor për të siguruar që dollarët e taksapaguesve të mos keqmenaxhohen, abuzohen ose shpërdorohen, për të hedhur dritë në errësirën e burokracisë federale, për të parandaluar korrupsionin dhe për t'u siguruar që qeveria jonë federale po punon me efikasitet për popullin amerikan”, tha ligjvënësi James Comer, kryetar i komisionit të mbikëqyrjes së qeverisë federale.
Republikanët planifikojnë të hetojnë gjithashtu familjen e vetë presidentit, duke përfshirë akuzat se djali i tij, Hunter Biden, përfitoi në mënyrë të padrejtë nga pozita e babait të tij.
Mbikëqyrja e degës ekzekutive është një pjesë kyçe e rolit të Kongresit dhe analistët thonë se këto hetime janë të zakonshme kur qeveria dhe kongresi u përkasin partive të ndryshme.
"Edhe në një epokë të polarizuar, hetimet e Kongresit mund të bëjnë diçka të mirë. Por që të ketë një ndikim vërtet të dobishëm, të dyja palët duhet të bashkëpunojnë", thotë Ken Hughes me Universitetin e Virxhinias.
Por demokratët thonë se hetimet do të vënë në shënjestër në mënyrë të padrejtë presidentin.
"Është shumë për të ardhur keq që kemi parë këtë axhendë ekstreme republikane MAGA, e cila me sa duket është e përqëndruar në gjueti shtrigash dhe jo në atë që është në interes të familjeve amerikane", thotë ligjvënësi demokrat Hakeem Jeffries.
Çdo rregullim legjislativ, që del nga seancat dëgjimore të Dhomës së Përfaqësuesve, nuk do të miratohej në Senatin e kontrolluar nga demokratët.
"Ligjvënësit mund të përdorin mjetet që kanë për t'i detyruar njerëzit të vijnë për të folur me ta, edhe pse askush nuk pret që të ndodhë ndonjë ndryshim i vërtetë për shkak të këtyre hetimeve", thotë Sarah Binder me Institutin Brookings.
Zbulimi i dokumenteve të klasifikuara në rezidencën e presidentit Biden do të nxisë gjithashtu një hetim të Dhomës së Përfaqësuesve, që republikanët shpresojnë se do ta mbajnë fokusin te presidenti përpara zgjedhjeve të vitit 2024.
“Hetimet e Kongresit, siç kemi parë historikisht, zbehin miratimin për punën e presidentit. Ato njollosin vërtet atë që mendon publiku për presidentin”, thotë Sarah Binder.
Thirrjet e para për hetimet e Dhomës së Përfaqësuesve ndaj Departamentit të Drejtësisë u lëshuan javën e kaluar./VOA
