Mbahet sot eventi për dorëzimin e certifikatave për rezidentët e parë te Durana Tech Park, hapësira që do të bëhet epiqendra e rritjes së sipërmarrjeve, zhvillimit teknologjik dhe ekonomik e rajonit. I pranishëm ishte edhe kryeministri Edi Rama, i cili deklaroi se 'Durana Tech Park' është produkti i parë konkret i një vizioni që dukej utopik.
Kreu i qeverisë bëri të ditur gjithashtu se brenda disa javësh do të përfundojë edhe procesi i 'reformimit' të Diellës, asistentes virturale në e-Albania, ku të gjitha veprimet do të kryhen nga ajo.
“Së shpejti prezantojmë modelin e AI në shërbimet publike, do të kalojmë nga asistentja dixhitale e e-Albanias që vetëm orienton marrësit e shërbimeve me zë në një nivel tjetër, ku do të bëjë punën që sot e bën dikush që hyn për të marrë shërbimin. Është çështje javësh, një apo dy muajsh, që ky nivel tjetër i asistencës në shërbimet dixhitale të bëhet i aksesueshëm.", u shpreh kryeministri.
Kreu i qeverisë tha se shumë kompani të huaja kanë shprehur interes për t'u bërë pjesë e 'Durana Tech Park' nga vende të ndryshme jo vetëm në Evropë, por edhe nga SHBA dhe vendet aziatike. Interes kanë shfaqur gjithashtu edhe institucione akademike, teksa kryeministri përmendi tre universitete të njohura italiane.
Rama tha se po rishikojnë kornizën ligjore për të bërë të mundur që këto institucione të bëhen pjesë e kësaj shoqërie dixhitale. Kryeministri deklaroi gjithashtu se synojnë ta kthejnë 'Durana Tech Park' në një një hapësirë në funksion të BE.
"Ajo që është surprizë e bukur për ne në interesimet për t’u bërë pjesë e shoqërisë dixhitale të Durana Tech Park, nuk është thjesht numri i kompanive të huaja apo diversiteti i hartës nga SHBA, Franca, Gjermani e deri në Azi, por është aspekti tjetër ai që na bën më shumë përshtypje që ka interes nga institucione akademike, me reputacion në Evropë. Ka filluar procesi për 3 universitete të mirënjohura italiane, dhe ka interes edhe nga të tjera. Kjo na bën që të rivizionojmë pak kornizën rregullatore që t’i japim mundësi institucioneve akademike që të hyjnë në këtë shoqëri dixhitale. Siç e kemi bërë me dije më parë, jemi në bashkëpunim të ngushtë me Francën që sot ka marrë flamurin e vendit lider në inivacion dhe AI dhe pjesë e këtij bashkëpunimi me Francën është edhe zhvillimi i Durana Tech Park si destinacion për kompanitë nga BE për të krijuar një hapësirë në funksion të BE, duke lehtësi për to, ndërkohë që BE është në procesin e de regullimit të domosdoshëm për komoanitë në këtë fushë. Ne iu japim atyre një hapësirë, që duke qendruar në zemër të Evropës.", u shpreh Rama.
Synimi tha kryeministri është që me këtë iniciativë të rrisin të ardhurat në buxhetin e shtetit në gjysmë miliard euro. Në fund, Rama iu bëri thirrje të rinjve shqiptarë që ta shohin 'Durana Tech Park' si 'atdheun e tyre brenda atdheun tonë të madh'.
"Synojmë që të arrijmë shumë shpejt mbi 5 mijë mundësi për punë, për ekspertët e teknologjisë dhe të rinjtë me paga shumë më të larta. Synojmë që të rrisim eksportet dhe të ardhurat tona me afërsisht 3.5 miliardë euro brenda dy dekadave vetëm nga kjo iniciativë, që e kemi studiuar dhe konfirmuar së bashku me partnerët tanë francezë. Synojmë që po ashtu të ardhurat në buxhetin e shtetit gjatë periudhës që po flas, vetëm nga kjo iniciativë të jenë mbi gjysëm miliardë euro. Në fund fare dëshiroj që edhe njëherë tjetër t’i bëj me dije të gjithë vajzave dhe djemve që punojnë në këtë sektor, që rrinë para një PC, që ëndërrojnë majat më të larta, që falë punës dhe dijes mbi teknologjinë sot kanë hedhur farën e një ndërmarrjeje të vogël që ta shikojnë Durana Tech Park si atdheun e tyre brenda atdheun tonë të madh.", përfundoi kryeministri.
Durana është parku i parë teknologjik në vend dhe përmes këtij parku, Shqipëria synon të kthehet në lider rajonal në zhvillimin e teknologjive. Qëllimi i Durana Tech Park është që të krijojë një mjedis të veçantë ekonomik dhe teknologjik që ofron kushte të favorshme për zhvillimin e industrive të avancuara.
Komente
