TIRANË- 4 vite burg gjithsej për 5 të pandehur ka dhënë GJKKO për një prej fraksioneve të dosjes ‘5D’, që nisi si hetim ndaj 3 ish drejtorëve të bashkisë së Tiranës.
Në fraksionin për shkelje në tendera për rastin “Tirana Parking”, u dënua me 1 vit burg Eglantina Zeren, e cila paracaktoi fatin e procesit tenderues.
Eglantina Zere, në cilësinë e titullarit të autoritetit kontraktor “Tirana Parking” në bashkëpunim, Enkelejda Qyta, Bruno Koçi, Rivjola Baxha dhe Kristo Zhulati, anëtarë të Komisionit të Vlerësimit të Ofertave, kanë avantazhuar 5D për rikonstruksionin e sheshit të parkimit te Selman Stermasi në tetor 2019.
Zere do të vuajë 9 muaj burg, për shkak se 1/3 i ulet nga gjykimi i shkurtuar. Me nga 9 muaj u dënuan edhe 4 të pandehurit e tjerë në këtë proces, të cilët gjithashtu përfituan ulje dënimi në 6 muaj heqje lirie.
Gati 3 javë më parë Gjykata e Posaçme shpalli vendimin për fraksionin e dytë të dosjes 5D, duke dënuar drejtoreshën e Klubit Sportiv Tiranë Deborah Keçi dhe 3 të tjerët, Teuta Guri, Renaldo Gjerazi dhe Jetjon Mera. Të gjithëve iu shndërrua dënimi në shërbim prove.
Për dosjen e famshme “5D” vijon gjykimi më I rëndësishëm ndaj ish drejtorëve të Bashkisë së Tiranës. Tre ish drejtorët Redi Molla, Taulant Tusha, Mariglen Qato dhe të pandehurit e tjerë Enton Punavija, Julian Zanaj, Albano Janku, Nestor Muhametllari po gjykohen me proces të zakonshëm.
Komente
