GJKKO ka zgjatur me tre muaj të tjerë hetimin ndaj ish zëvendës kryeministrin në arrati Arben Ahmetaj për dosjen "Buka sha", i akuzuar për shpërdorim detyre. Kërkesa për zgjatje të hetimit e bërë nga SPAK është dakordësuar edhe nga mbrojtja. Seanca e radhës pritet që të mbahet më 2 korrik 2025.
Kjo është hera e dytë që hetimet ndaj Ahmetajt zgjaten për 3 muaj. Ndaj Ahmetajt është ngritur akuza për veprën penale të shpërdorimit të detyrës në vlerë dëmi rreth 7 miliard lekë të vjetra, teksa Ahmetaj ndodhet prej vitit 2023 në kërkim ndërkombëtar për inceneratorin e Elbasanit dhe pasurinë e pajustifikuar.
Prokuroria e Posaçme ka vënë në hetim edhe 7 persona të tjerë, përfaqësues të Ministrisë së Financave dhe ndaj biznesmenit Lirim Fezollari, i cili sipas SPAK, edhe përfitoi nga privatizimi në kohën kur Ahmetaj ishte ministër i Financave.
Dyshohet se mes Ahmetajt dhe biznesmenit ka pasur marrëdhënie përtej komunikimit institucional, nga e cila ka arritur të privatizojë aksionet e shoqërisë “Buka Sh.a”, e ndodhur në një nga pikat më të lakmuara të Tiranës. Lidhur me këtë procedurë, paraardhësi i Ahmetajt, Shkëlqim Cani e kishte refuzuar. Prona prej mijëra metrash katror i është njohur prej vitit 1994 nga Agjencia e Kthimit dhe Kompensimit, familjes Myderzi.
Ish-zv.kryeministri ndodhet në kërkim ndërkombëtar në kuadër të dy procedimeve të mëparshme të bashkuar në një të vetëm, për “Fshehje të pasurisë", “Korrupsion pasiv" dhe “Pastrim parash”. Atij i janë sekuestruar disa pasuri dhe prona dhe një pjesë e tyre dyshohet të jenë vënë falë marrëdhënies me pronarët e inceneratorëve Klodian Zoto e Mirel Mërtiri që ndodhen po ashtu në kërkim.
Komente
