Emisioni ‘Repolitix’ në Report Tv trajtoi sot edhe dërgimin e dosjes së ish-ministrit Ilir Beqaj në GJKKO nga Prokuroria e Posaçme, me 6 akuza penale.
Avokati Leonard Karaj u shpreh se ish-zyrtari socialist për çështjen e fondeve të SASPAC rrezikon deri në 20 vite burgim, pasi dosja dhe akuzat janë sikur të kishte kryer 4 vrasje dhe jo shpërdorim fondesh.
“Dosja dhe akuzat ndaj Ilir Beqajt janë shumë të rënda, ngarkesa është shumë e rëndë, korrupsion pasiv është më e rënda, shkon deri në 12 vite burg. Duke parë edhe shifrën e dëmit, nga dosja duket sikur ai ka bërë 4 vrasje. Por bëhet fjalë për SPAK dhe ato që përfshin vepra penale. Beqaj rrezikon të paktën 20 vite burgim. Por duhet thënë se këto janë arrestime apo burgosje pa gjyq, pra mbahet deri në 3 vjet në qeli, gjendet i pafajshëm dhe pastaj duhet t’i paguash edhe dëmin. Por këta rreken që duke e mbajtur aty t’i gjejnë ndonjë provë. Për mendimin tim Kodi Penal duhet grisur dhe të ribëhet nga e para, thonë po bëhet por ai duhet dje dhe jo nesër. Kodi i Procedurës është i padrejtë, shumë i ashpër”.
Kurse gazetari Flogert Muça nënvizoi se Beqaj praktikisht do i duhet të vuajë për çdo 3 mijë euro një vit burgim.
“Lajmi i mirë është përfundimi i hetimeve. Solidarizohemi nga ana njerëzore, por jetojmë në këtë vend dhe drejtësia duhet bërë për të gjithë, edhe për Ilir Beqajn. Por kur e sheh nga jashtë duket se në lidhje me dëmin dhe veprat penale, burgun që ai rrezikon, i bie që Beqaj të vuaj 1 vit burg për 3 mijë euro. Nuk ka asnjë përfitim politik të merresh me Beqajn. Por nuk është çudi që te ajo listë të ketë edhe nga krahu i opozitës si ka vajtur puna”, tha ai.
Karaj foli edhe për çështjen e Ilir Metës, ku dha lajmin se i janë gjetur edhe 6 telefona të tjerë për interesin e çështjes së CEZ-DIA apo lobimin në SHBA.
“Ilir Metës i ka gjetur SPAK-u 6 telefona, unë nuk e dija, sot e mora vesh këtë. SPAK mendon se këta telefona janë me shumë rëndësi për hetimin dhe i ka marrë në dorëzim për hetim. Duke parë edhe procedurat që ndiqen në verdikte, përgjithësisht si për rastin e Beqajt, metës dhe të tjerëve, GJKKO jep apo aprovon kërkesën e prokurorëve të SPAK, por duhet pritur edhe vendimi i formës së prerë të gjykatës”, tha avokati.
Komente
