Gati 4 vite e gjysmë nga nisja e hetimeve, mbi 6 muaj pasi Sali Berisha, dhëndri i tij Jamarbër Malltezi dhe 3 të tjerë u morën të pandehur dhe rreth 5 muaj e gjysmë pas dërgimit të dosjes në gjykatë, procesi gjyqësor për aferën korruptive “Partizani” nuk nisi as këtë të premte. Sërish një zvarritje e provokuar nga të pandehurit.
Sali Berisha u mor i pandehur me akuzën e korrupsionit më 11 shtator 2024. Një muaj më pas më 15 tetor, dy prokurorët Arben Kraja dhe Enkelejda Millonai dërguan në gjykatë 333 fashikujt hetimorë, ndërsa të nesërmen më 16 tetor u caktua me short gjyqtarja e seancës paraprake Flojera Davidhi, e cila vetëm pak javë pasi e mori në duar, vendosi t’i heqë masën e sigurisë ish kryeministrit Berisha, duke e çliruar nga “arresti shtëpiak” ku qëndroi për 11 muaj. Vendim i cili u rrëzua në Apel, ku gjyqtari Engert Pëllumbi i riktheu masë siguri ish kryeministrit, këtë herë detyrimin për tu paraqitur dy herë në muaj në Prokurorinë e Posaçme.
Davidhi, tashmë e përcaktuar si gjyqtarja e seancës paraprake të Partizanit, caktoi 24 tetorin për seancë të parë, ku logjikisht mund të kishte edhe një vendim për kalim të dosjes në gjyq, por edhe tani kur kanë kaluar më shumë se 10 seanca të gjata dhe shtyrje pa fund ende s’ka një vendim.
Si fillim kërkesa pa fund të pranuara të avokatëve mbrojtës të palëve për kohë për tu njohur me materialet. Kohë u kërkua edhe ne seancën e dytë ndërsa me pas ishin prokurorët ata qe pas tre seancash me 6 janar të këtij viti, përfunduan leximin e kërkesës për gjykim, ku kërkuan kalimin për gjykim të te gjithë të pandehurve.
Pas prokurorëve, radha e mbrojtjes! Fillimisht ishin avokatët e Berishës, të cilëve iu deshën tre seanca të plota vetëm për leximin e 300 faqe pretendime te tyre. Më pas mbrojtja e Malltezit dhe të pandehurve të tjerë, Bektashi, Begeja, financieres Pustina e deri të kompanitë e marra të pandehura “Homplan” “Studio Pustina” dhe kompania “Kontakt”. Që nga janari e deri te seanca e zhvilluar më 13 mars, mbi 2 muaj, përfundoi mbrojtja e të gjithë të akuzuarve në seanca të gjata që nisnin nga ora 9 e përfundonin në orën 16.
Pas dështimit të kësaj seance të së premtes, sërish me makinacione të mbrojtjes seanca e radhës është caktuar më 11 prill. Do të jenë prokurorët ata që do t’i përgjigjen pretendimeve të avokatëve për të kaluar më pas fjalën te gjyqtarja Davidhi. Ende nuk ka një datë për vendimmarrje. Pra duket qartë një tendencë për ta zvarritur një proces që duket sikur po e çojnë në “kalendat greke”. Qëllimi siç duket është që të paktën gjyqi i themelit të mos nisë para zgjedhjeve të 11 majit.
Dërgimi në gjyq i dosjes do të ishte përballja e parë reale e Berishës dhe Malltezit me drejtësinë shqiptare. Berisha dhe Malltezi vijojnë të jenë në masë sigurie, i pari “detyrim paraqitje” dhe i dyti “arrest shtëpie”. Ish kryeministri është i pandehur për korrupsion pasiv dhe akuzohet se lejoi një zinxhir të tërë institucionesh që të shkelnin ligjin duke ua kompleksin Partizani ish-pronarëve, ku përfituesi kryesor është dhëndri i tij, i pandehur për korrupsion pasiv dhe pastrim parash. Në pronat e ish-klubit u ndërtuan të paktën 19 kulla pallatesh, duke u siguruar një fitim miliona euro nga ky biznes që nisi me paligjshmëri.
Me Berishën e Malltezin të pandehur janë edhe bashkëpunëtorët e tyre, biznesmeni Fatmir Bektashi, i pandehur për “korrupsion aktiv” dhe “pastrim parash”. Akuza e “pastrimit të parave” i është komunikuar edhe ortakut të Malltezit, Xhimi Begeja, trashëgimtar i tokës dhe bashkëpronar i 'Homeplan', si dhe Andia Pustinës, financieres që kryente të gjitha operacionet financiare dhe ligjore të Homeplan.
Paralelisht SPAK ka vënë në sekuestro preventive pasuri të shumta që i përkasin Jamarbër dhe Argita Malltezit, sekuestro e konfirmuar deri në Gjykatë Kushtetuese, ku përfshihen dhjetëra apartamente, vila, troje dhe llogari bankare, të cilat do të qëndrojnë të sekuestruara deri në përfundim të gjykimit.
Ndërkohë një tjetër hetim vazhdon me fraksion të kësaj dosjeje për pasurinë e ish-kryeministrit dhe verifikime nëse familjarët e tij kanë përfituar nga vendimet e tij si me rastin marrjes së truallit të Kompleksit Partizani dhe ndërtimin e 19 kullave nga dhëndri i tij.
Komente
Shtyrja e gjyqit te kryehajduteve Berisha-Malltezi deri pas zgjedhjeve parlamentare eshte krejt normale dhe e pranueshme, por jo me tej!
Përgjigju