Tiranë- Gjykata e Posaçme e Apelit ka rrëzuar sot (27 maj) kërkesën e ish-deputetit socialist Jurgis Çyrbja dhe Ahmet Mashës, për heqjen e së sigurisë “arrest me burg”, e vendosur prej një viti me kërkesë të SPAK.
Apeli ka lënë në fuqi vendimin e Shkallës së Parë, për zgjatjen e afateve hetimore me 3 muaj, që ishin kundërshtuar nga personat nën hetim.
SPAK ka afat deri më 20 korrik për të përfunduar hetimet për këtë dosje. Organi hetues pret përgjigje për letër-porosinë e nisur partnerëve jashtë Shqipërisë, ku janë kërkuar informacione lidhur me disa episode të çështjes dhe subjekteve që po hetohen.
Jurgis Çyrbja u arrestua më 20 tetor të vitit të kaluar, për akuzën e korrupsionit aktiv në zgjedhje, përkrahje krimi dhe nxjerrje e sekretit shtetëror.
Ish-deputeti i arrestuar i qarkut Durrës akuzohet nga SPAK se u ka shitur informacione grupit kriminal të Altin Hajrit dhe madje ka ndërhyrë për t’i favorizuar në disa episode. Lidhja e tij sipas dosjes hetimore, u zbërthye pas dekriptimit të mesazheve në platformën e koduar SKY ECC. I përfshirë në këtë fashikull akuzohet edhe Ahmet Masha, ndërsa hetimet dhe verifikimet vijojnë.
Komente
