Një e penduar, si bashkëpunëtore e drejtësisë, është në dosjen e SPAK për kryebashkiakun e Tiranës, Erion Veliaj. Adela Kondakçiu, financiere në kompaninë e Ajola Xoxës, më 25 prill 2025 u bë e penduara e Prokurorisë së Posaçme, 2 muaj e gjysmë pasi SPAK kishte arrestuar Erion Veliajn dhe kishte kërkuar masa sigurie për 7 të tjerë.
Adela Kondakçiu ka punuar për një kohë të gjatë, që prej vitit 2018, si financiere e Ajola Xoxës dhe nga fundi ishte hequr nga puna pasi kishte shprehur pakënaqësi për pagesat.
Për herë të parë u mor në pyetje nga SPAK në më 10 dhjetor të 2024-ës, 4 ditë pasi i ishte bërë kontroll personal më 6 dhjetor, kontroll zyre si dhe i ishte sekuestruar celulari.
Që me marrjen në pyetje më 10 dhjetor, Adela Kondakçiu pretendoi se i ishte bërë presion nga tashmë ish-shefja e saj Ajola Xoxa dhe avokatë. Por para se ta merrte si të penduar, SPAK më herët e regjistroi si person në hetim Kondakçiun më 3 prill, e mori në pyetje për disa orë më 9 prill, dhe vetëm 16 ditë më vonë e bëri bashkëpunëtore të drejtësisë.
Mbetet për t’u nënvizuar se këtë fakt të hetuarit e tjerë, mes tyre edhe Erion Veliaj e Ajola Xoxa, e kanë mësuar vetëm në momentin kur janë marrë të pandehur. Deri në këto momente Report Tv nuk ka mundur të vërtetojë nëse znj. Kondakçiu është marrë edhe ajo e pandehur, për t’u trajtuar e favorizuar, apo është amnistuar totalisht nga SPAK.
Duke filluar nga e hënë e kaluar Prokuroria e Posaçme nisi komunikimin e akuzave zyrtare për dosjen e kryebashkiakut të Tiranës Veliaj, duke njoftuar edhe përfundimin e hetimeve, për të lënë kohë deri më 24 shtator, si datë fundore për të dërguar çështjen në gjykim.
Kryebashkiakut Veliaj iu komunikuan akuzat e korrupsionit, pastrimit të parave, fshehjes së pasurisë dhe futje e sendeve në burg. Gjithsej të pandehur për këtë dosje janë 30 të pandehur, 14 persona dhe 16 kompani, mes të cilëve bashkëshortja e kryebashkiakut Ajola Xoxa, 7 biznesmenë, deputetja Klotilda Bushka, një polic i burgjeve etj.
Komente
Nuk besoj te vleje shume statusi i /te penduarit/,apo bashkepunetorit te drejtesise ne kete rast.Avokatet e Velise do t'a paraqesin si /hakmarrje personale/ meqe Kondakciu ishte pushuar nga puna per pakenaqesi ne lidhje me rrogen.I takon SPAK-ut qe te vertetoje qe akuzat qendrojne,pavaresisht /hakmarrjes personale/ qe do t'a quajne avokatet.Ne rastin konkret perse eshte intimiduar? Cfare i eshte bere presion qe te mos tregoje?
PërgjigjuHakmarrja personale bie posht ne rastin kur bashkpuntori percjell prova konkrete, dokumentacione, fakte. Pjesa intimidimit eshte plus per prokurorine per te hedhur poshte hakmarrjen personale, nqs vertetohet :) P.S: Prejini dhe Ajoles bileten ke qelia se boll nejti rrugve.