Tirane- Ka zgjatur pak mbledhja e përbashkët e Këshillit Legjislacionit dhe Komisionit të Ligjeve, aty ku u bë e qartë se drafti i vettingut në politikë do të diskutohet nga ekspertët konstitucionalistë përveçse do të shkojë në Komisionin e Venecias për opinion. Ky rrugëtim nuk bllokon vettingun, të paktën këtë kanë lënë të kuptohet palët politike.
“Jemi për pastrimin e politikës sigurisht. Kjo nismë është e cënuar se lë jashtë të afërm e familjarë të politikanëve, por edhe persona juridik apo fizik që kanë lidhje të fshehta me politikanët. Në rrafshin ligjor ne kërkojmë të respektohet Kushtetuta dhe rregullorja e Kuvendit. Ne jemi të mendimit që kjo nismë ti nënshtrohet një diskutimi të gjërë, pse jo dhe marrja e një mendimi nga Komisioni i Venecias, për të cilën opozita përdorte një shprehje në kohën e reformës në drejtësi: Venecia është tabani i demokracisë. Drafti do të diskutohet edhe nga ekspertë konstitucionalistë.
Ulsi Manja
Përfaqësuesit e Partisë Demokratike e kishin bojkotuar mbledhjen, përveç Oerd Bylykbashit që kërkoi t’i vihej në dispozicion drafti që do i dërgohej Venecias.
“Pyetjet të dorëzohen në sekretarinë e Kuvendit. Dua të shoh dosjen që do i dërgohet Venecias”.
Oerd Bylykbashi
Sipas deputetit demokrat, lidhje mes krimit e politikës ekziston në forma dhe kanale të ndryshme, që nga mbështetja politike për krimin, tek aksesi në institucionet shtetërore, tek favorizimi i bizneseve apo personave me lidhje kriminale në ekonomi.
“Një pjesë e madhe e kësaj mbështetje zhvillohet në kufijtë e ligjit: politikanët janë bërë të zgjuar dhe dinë si të japin mbështetje pa shkelur ligjin dhe pa lënë gjurmë. Ky është qëllimi kryesor i vetingut në politikë: të krijojë një filtër shtesë për pengimin e depërtimit të ndikimit dhe interesave kriminale në politikë”.
Oerd Bylykbashi
Kryetari i Komisionit të Legjislacionit, Gramoz Ruçi nga ana e tij premtoi se ky proces nuk do të ketë zvarritje.
“Nuk do ketë zvarritje ky proces. Të merren masa për dëgjimin e ekspertëve. Konsitucionalistët në momentin që janë gati do të na njoftojnë”
Gramoz Ruçi
Komente
