Rrugën drejt anëtarësimit në Bashkimin Evropian, Shqipëria do të përshkojë me mbështetjen financiare të Bankës Evropiane të Investimeve, e cila do të hapë një degë edhe në Shqipëri.
Marrëveshja për hapjen e përfaqësisë në Shqipëri është nënshkruar nga qeveria dhe Banka Evropiane, ndërkohë që pritet ratifikimi edhe në Kuvend. Në relacionin e projektligjit që shoqëron marrëveshjen thuhet se hapja e përfaqësisë në Shqipëri, synon të mbështesë vendin në përshpejtimin e procesit të integrimit.
“Marrëveshja synon hapjen e zyrës së Bankës Evropiane të Investimeve (në vijim BEI) në Shqipëri, me qëllim forcimin e marrëdhënieve ndërmjet Republikës së Shqipërisë dhe BEI-t e përshpejtimin e realizimit të objektivave që ka Shqipëria për anëtarësimin e saj në Bashkimin Evropian”, thuhet në relacion.
Banka Evropiane që është organ i Bashkimit Evropian me këtë vendim kërkon të forcojë prezencën në Shqipëri në kushtet kur vendi pritet të përfitojë me miliona euro nga plani i rritjes së BE. Por përveç se do të jetë banka që do të lëvrojë fondet që BE do të japë për Shqipërinë, po ashtu do të ketë rol edhe në zhvillimin ekonomik rajonal.
“BEI synon që nëpërmjet hapjes së zyrës në Tiranë të forcojë prezencën e saj në Shqipëri, duke nisur së pari nga rritja e përfaqësimit të saj në Tiranë, në përpjekje për të diversifikuar edhe polet ekonomike/zhvillimore në Ballkanin Perëndimor, nisur kjo nga zhvillimet e vrullshme ekonomike në Shqipëri, perspektiva e zbatimit të planit të rritjes dhe nga rritja e kërkesës për burime financimi nga nivelet më të larta politike”, thuhet në relacion.
Banka Evropiane e Investimeve është një nga kreditorët më të mëdhenj globalë, që jep hua me norma të ulëta interesi me maturim të zgjatur në kohë. Financimet e BEI janë të përqendruara në projekte që plotësojnë kriteret që ajo cakton, kryesisht në transport, sektorin e furnizimit me ujë dhe në energji.
Banka është edhe një nga bashkë-financuesit edhe të rehabilitimit të hekurudhës Vorë-Hani i Hotit me vlerë 100 milionë euro, ndërkohë që në total hekurudha kushton 373 milionë euro.
BEI ka nisur financimin e saj në Shqipëri nëpërmjet kredive që në vitin 1995 dhe deri më tani vlera e kredive të dhëna për Shqipërinë përllogaritet në 457.95 milionë euro. ku pjesën më të madhe e zënë investimet në sektorin e transportit me 56.28%, sektorin e furnizimit me ujë me 23.37%, sektorin e energjisë me 15.29% dhe sektorë të tjerë me 5.07%.
Komente
