Tirana do të jetë stacioni i fundit elektoral për partitë politike para zgjedhjeve të 11 majit.
Mësohet se PS do të bëjë mbylljen e fushatës të premten në orën 19:00 në fushën pranë Parkut Olimpik. Në të njëjtën orë, edhe PD do të mbajë mitingun përmbyllës te Bulevardi i Ri.
"Të gjithë bashkë për një “Shqipëri Madhështore”. Më 9 maj në ora 19:00 në Bulevardin e Ri, përmbyllim një rrugëtim, nisim një mision.", njoftoi kreu i PD Sali Berisha përmes një postimi në rrjete sociale.
E shtuna është heshtje zgjedhore, ndërsa të dielën e 11 majit, shqiptarët do t'i drejtohen kutive të votimit.
Në këtë muaj fushate, PS e ka përqendruar fokusin te integrimi evropian. Kryesocialisti Edi Rama deklaron se vetëm me PS, rrugëtimi evropian do të bëhet i mundur. Nga ana tjetër, kreu i PD Berisha flet për ndryshim, ndërsa drejtuesit e partive të tjera të reja kërkojnë votën e shqiptarëve për të larguar klasën e vjetër politike.
Komente
