Policia e Tiranës në 24 orët e fundit ka vënë në pranga 13 persona dy prej të cilëve për kultivim të lëndëve narkotike, pasi gjatë kontrollit të ushtruar nga në një sipërfaqe të pyllëzuar në vendin e quajtur “Grykëderdhja e liqenit të Sharrës”, Njësia Administrative Vaqarr, kanë konstatuar lëndë narkotike kanabis sativa.
Si rrjedhojë, të kapur në flagrancë, policia ka bërë arrestimin e F. XH. dhe I. XH., të cilët dyshohet të jenë kultivuesit.
Ndërkohë nga efektivët e komisariatit numër 1 u bë arrestimi në flagrancë, për veprën penale “Organizimi ose ushtrimi i veprimtarive të lojërave të fatit në kundërshtim me ligjin”, i shtetasit E. GJ., 22 vjeç, pasi në rrugën “Petro Nini”, në ambientin e një bar-kafeje ushtronte aktivitetin e paligjshëm të lojërave të fatit.
Në Marikaj është arrestuar një shtetas kosovar, F.Q 30 vjeç, i cili në një pikë karburanti ka përdorur një kartëmonedhë 50 euro, e dyshuar e fallsifikuar.
Seksioni për Hetimin e Narkotikëve në bashkëpunim me Komisariatin e Policisë Nr.4, bënë arrestimin në flagrancë të shtetasit SH.M., 31 vjeç, pasi gjatë kontrollit të ushtruar në mjetin me të cilin qarkullonte iu gjet dhe iu sekuestrua në cilësinë materiale një sasi lëndë e dyshuar narkotike cannabis sativa.
Nga specialistët për Hetimin e Krimit në Komisariatin e Policisë Kavajë u bë arrestimi në flagrancë i shtetasve G. XH., 50 vjeç dhe L. XH., 48 vjeç, pasi në fshatin Luz i Madh, Rrogozhinë, pas një konflikti për motive të dobëta, kanë goditur njëri-tjetrin me grushte, duke i shkaktuar dëmtime në trup njëri-tjetrit. Shtetasi G. XH. ka goditur me mjet prerës shtetasin L. XH., i cili ndodhet në spital, jashtë rrezikut për jetën.
Specialistët e Qarkullimit Rrugor bënë arrestimin në flagrancë të shtetasve:
-L. SH., 52 vjeç dhe M.S., 30 vjeç, pasi u kapën duke drejtuar mjetet pa lejen përkatëse;
-I. G., 45 vjeç, pasi në rrugën “Muzaket”, u kap duke drejtuar mjetin në gjendje të dehur, në masën 0.86 mg/l dhe pa lejen përkatëse;
•E.I., 48 vjeç, pasi në bulevardin “Bajram Curri”, u kap duke drejtuar mjetin në gjendje të dehur në masën 0.56 mg/l.
-A. A., 20 vjeç, pasi në rrugën “Myslym Keta”, ditën e djeshme ka aksidentuar një këmbësor, shtetasin e mitur me iniciale G. N., i cili ndodhet në spital, nën kujdesin e mjekëve.
Nga specialistët për Hetimin e Krimit në Komisariatin e Policisë Nr. 3 u bë ekzekutimi i urdhrit të Prokurorit, për shtetasin në kërkim R. S., 28 vjeç pasi Gjykata e Apelit Tiranë i ka caktuar masën e sigurisë “Arrest në burg”, për veprën penale “Dhunë në familje”.
