Izraeli ka përdorur një “trishembull” për të sulmuar Iranin. Arma e parë ka qenë forca ajrore dhe raketat e lëshuara nga distanca. E dyta ka qenë përdorimi i dronëve kamikazë të futur brenda territorit iranian. E treta është përfaqësuar nga specialistët e shërbimit sekret izraelit, Mossad.
Tel Avivi ka zbatuar një plan të hartuar prej vitesh, i testuar në stërvitje me armë të vërteta dhe në misione reale, i përshpejtuar sidomos në tetë muajt e fundit (siç pretendohet), kur u krijua një “dritare e favorshme mundësie”: dobësimi i aleatëve të Teheranit që përbënin rrethin e zjarrtë përreth shtetit hebre (Hamas, Hezbollah), dobësimi i brendshëm i Republikës Islamike, kthimi i Trump në skenën politike, kushtet “teknike” dhe një besim i lartë në suksesin e misionit, pavarësisht të panjohurave që shoqërojnë çdo ndërhyrje ushtarake.
Shtabi i përgjithshëm izraelit nisi valën e parë të sulmit në orën tre të mëngjesit dhe ka paralajmëruar se do të ketë të tjera. Janë përdorur 200 avionë – përfshirë avionë luftarakë, mbështetës dhe për luftë elektronike – të cilët kanë lëshuar jo më pak se 300 raketa mbi 100-150 objektiva të ndarë sipas “kategorive”. Në shënjestër ishin disa objekte bërthamore, baza ushtarake, pozicione raketash dhe radarësh, si dhe eksponentët më të lartë të ushtrisë iraniane, duke filluar nga drejtuesit e Gardës Revolucionare deri te shkencëtarët që udhëhiqnin programin bërthamor.
Një ndërhyrje e gjerë, e menduar për të shkaktuar dëme në sistemin që çon drejt krijimit të bombës atomike, për të hapur korridore për sulme të tjera dhe për të shkaktuar kaos në radhët e kundërshtarëve. Sulmet kanë eliminuar dhjetëra figura kyçe, por gjithashtu kanë shkaktuar humbje edhe në mesin e civilëve, pasi janë goditur ndërtesa dhe rezidenca. Regjimi iranian flet për rreth 80 të vdekur dhe mbi 300 të plagosur.
IDF ka ndërmarrë “Operacionin Luani që Ngrihet”, duke ndjekur një skemë të përdorur më parë në përballjet e zgjatura me Iranin, por këtë herë e ka zgjeruar dhe e ka thelluar më tej, duke përfshirë instalime strategjike dhe figura udhëheqëse. Ditët në vijim do të tregojnë pasojat reale për objektin në Natanz dhe për impiantet e tjera të përfshira në projektin bërthamor. Nuk përjashtohen ndërhyrje të reja për të nxjerrë jashtë funksionit laboratorë jetikë, në varësi të analizave që kryen inteligjenca izraelite.
Në një rindërtim të ngjarjes të publikuar në media, izraelitët kanë ofruar versionin e tyre se si kanë arritur të eliminojnë një numër kaq të madh zyrtarësh. Thuhet se kanë mundur t’i përqendrojnë në një vend të vetëm figurat më të rëndësishme, nga komandanti i pasdaranëve Hossein Salami, te drejtuesi i sektorit hapësinor Amir Ali Hajizadeh. Dhe, sipas Fox News, kanë arritur që ata të qëndronin në atë vend pikërisht në momentin kur u godit me raketa.
Sigurisht, historia mund të korrespondojë me realitetin, por mund të jetë edhe një përpjekje tjetër për të theksuar aftësitë izraelite dhe për të dëmtuar imazhin e pasdaranëve. Rezultatet gjithsesi kanë qenë shkatërruese për hierarkinë shiite, dhe paralelizmat janë të qarta me atë që ndodhi verën e kaluar, kur një fat i ngjashëm u rezervua për drejtuesit e Hezbollah-ut, deri atëherë të pakapshëm.
Nëse arrin të shkatërrosh elitën e armikut brenda kryeqytetit të tij, në një goditje të vetme, do të thotë që ke njohuri, “miq” të brendshëm, burime të sigurta dhe teknologji të avancuar. Prej pothuajse dy dekadash, ushtria izraelite është stërvitur për këtë moment, duke rafinuar taktikat dhe duke futur agjentë – burra e gra – përtej kufirit. Lëvizje të koordinuara të IDF dhe inteligjencës izraelite që kanë mundësuar fazat paralele të operacionit me ndërhyrjen ajrore.
Sërish Tel Avivi ka dhënë detaje për median lidhur me rolin e Mossad-it. Agjentët e tij kanë mundur të transportojnë dronë kamikazë në territorin iranian, duke i fshehur në “shtëpi të sigurta” dhe më pas i kanë përdorur për të goditur baza ushtarake, raketa tokë-tokë, qendra komanduese dhe pajisje të vlefshme për kundërpërgjigjen e mundshme të Teheranit. Këto mjete fluturuese nuk kanë pasur nevojë të kalojnë kufirin, pasi tashmë ndodheshin në brendësi të vendit, ndoshta të futur në kontenierë apo përmes rrugëve të kontrabandës, nëpër det apo nëpër male.
Izraelitët kanë vepruar njësoj si ukrainasit, të cilët dëmtuan shumë bombardues rusë duke përdorur kamionë si baza lëshimi për dronë me eksploziv. Në të vërtetë, ka pasur shenja të mëparshme që Teherani i ka nënvlerësuar në mënyrë të pashpjegueshme. Në vitet 2022 dhe 2023, gjithashtu dronë të vegjël kishin goditur objektiva në Parchin, Hemmat, Karaj dhe Isfahan – sulme “të vogla” që iu atribuoheshin Mossad-it. Këto veprime kishin për qëllim jo vetëm provokimin e regjimit, por edhe testimin e kundërmasave të tij, duke shërbyer si prova për përgatitjen e fazës finale të sulmit aktual, që tashmë ka hapur edhe një “front” tjetër.
Bërthama të vogla operative thuhet se kanë përdorur raketa portative të montuara mbi automjete ose të vendosura pranë kazermave, me qëllim shkatërrimin e lëshuesve të raketave, radarëve dhe mjeteve ushtarake. Këto veprime të fshehta janë dokumentuar përmes videove të shkurtra të publikuara nga ushtria izraelite (IDF), por për vërtetësinë e tyre nuk ka konfirmime të pavarura. Pamje që bëjnë pjesë në luftën e propagandës, ashtu siç ka ndodhur edhe në përplasjet e mëparshme të armatosura.
“Lëvizshmëria” e Mossad-it dhe përdorimi i dronëve – të mohuara nga Teherani – konfirmojnë një realitet ku izraelitët duket se kanë mbështetje brenda vetë Republikës Islamike. Ndoshta nga anëtarë të opozitës që në të kaluarën kanë bashkëpunuar në operacione dhe sabotime, ose nga individë pa ideologji të gatshëm për të vepruar. Disa prej tyre janë arrestuar, gjykuar dhe ekzekutuar nga regjimi iranian, me dënime kapitale që shërbejnë si shembull dhe paralajmërim.
Interesante është se edhe pasdaranët kanë arritur së fundmi të rekrutojnë qytetarë të shtetit hebre, të gatshëm të përfshihen në atentate në këmbim të parave. Disa prej tyre kishin si detyrë mbledhjen e informacioneve për shkencëtarë dhe oficerë me qëllim eliminimin e tyre. Një skenar që Tel Avivi e sheh me shqetësim të madh, sidomos tani që përplasja ka hyrë në një fazë të re./Corriere Della Sera
Komente
