Kryetari i Partisë Agrare Ambientalisë, Agron Duka, thotë se pritshmëritë e tij për zgjedhjet e 11 majit ishin të paktën 30 mijë vota në rang vendi, megjithatë rezultati që morën ishte për i mirë dhe për notën “8”.
Në një intervistë ekzkluzive për moderatorin Denis Minga në ‘Repolitix’, ai shprehu habinë me sjelljen e militantëve të PD-së këto ditë, duke i quajtur reagimet e tyre “të tmerrshme” në lidhje me justifikimin se PAA mori vota nga demokratët, pasi ishin pjesë e Aleancës për Shqipërinë Madhështore.
Duka u shpreh për Report Tv se partia që drejton ka marrë 20 mijë vota bio, të vlefshme të paktën për dy mandate brenda aleancës opozitare, por që në fakt doli vetëm me 1 mandat të marrë nga lista e sigurt e PD. Nga aleatët e demokratëve, PAA dha më shumë vota, por ndryshe nga PL që mori 4 mandate me shumë më pakvota, PAA mori vetëm 1.
Në lidhje qëndrimin në opozitë apo bashkëpunimin me qeverinë e re, Duka nënvizoi se ajo është zgjedhja dhe vendimi i deputetit që ka fituar dhe jo e tij.
“Pritshmëritë ishin më të mëdha. Pasi pamë rezultatin besoj që rezultati është i kënaqshëm. Nëse do isha mësues dhe do të vija një notë nga 1 te 10, do vija notën 8. Jo shumë mirë, por mirë. Kjo për arsye se opozita në përgjithësi pati këto rezultate. Jo vetëm ky koalicioni i PD dhe Shqipëeria Madhështore, po edhe këto partitë e tjera nuk kapën pritshmëritë që mendonin. Të them të drejtën unë synoja mbi 30 mijë vota, ne arritëm të marrin 23600 vota, i kemi marrë si parti. Edhe këto nuk janë reale të gjitha, sepse ndonjë nga kandidatët ka proviniencë nga PD-ja që ne vetëm i kemi vënë siglën, siç është i Elbasanit dhe ai i Beratit. Të cilët ty ata kanë arritur të marrin rreth 3 mijë vota. Nëse ne aty nuk kemi asnjë lloj ndikimi, besoj se kemi si parti agrare, po të zemë se të gjitha ato janë vota PD-je, ne bio kemi 20 mijë vota”, tha Duka për Report Tv.
Ai shprehu habinë me reagimet e shumë militantëve demokratë, që numrin e madh të votave që PAA mori, e vetmja që doli e humbur në numër mandatesh nga listat e sigurta për votat që siguroi, ia dedikonin PD-së dhe jo forcës së agrarëve.
“Është e tmerrshme që ka një fobi ndaj partive të vogla. Shiko çfarë qëndrimesh mbajnë disa militantë të Partisë Demokratike. Ta zëmë se bëhet një status në Facebook i Partisë Agrare Ambientaliste, përgëzohen se kanë bërë 23600 vota. “Po çfarë keni bërë ju? Po ju keni marrë votat e PD-së. Ju kanë falur mandate. Apo do hynte Alimehmeti”. Nga ana tjetër, del Dash Shehi apo Agron Shehaj atje dhe u thonë atyre ça bëni, se doni veten, e shkatërruat PD-në. Kush qe e keqja që bëmë ne? Ne bëmë vetëm të mirë. Të jemi pragmatistë. Nëse do të dilnim vetëm, do të merrnim më shumë vota sepse do të kishim vetëm sigël PA. Këtu jemi në habitat jo tonin. Nga ana tjetër, meqenëse do të kishim 140 kandidatë, gara do të ishte më e fortë, por nuk do nxirrnim dot kandidat, është e vështirë të kapësh atë pragun 10 mijë vota në qark. Por nga ana tjetër ne mund t’ia hiqnim votat PD-së, si në Lezhë ku demokratët morën mandatin me 70 vota diferencë, ndërkohë që ne atje morëm 3 mijë vota. Sigurisht nuk janë të gjithë kështu në PD, interesi është reciprok, duhet parë edhe me këtë sy”, nënvizoi kreu i Partisë Agrare.
Në lidhje me sistemin elektoral, pritshmëritë, rezultatin e dobët të opozitës dhe pyetjes nëse Berisha duhet të dorëhiqet, ai u shpreh:
“Është Kodi i shëmtuar, Kodi të vjedh. Edhe Shehaj po të ishte në aleancë me ne mund të merrte edhe 6 deputetë. Në Durrës psh. po të futesha në listë mund të merrja vota nëse dilja vetëm dhe i hiqja mandatin e 6-të PD-së në Durrës. Duhet të jetë Berisha apo jo e vlerëson PD dhe vetë zoti Berisha që e vendos. Nuk di që një drejtues partie që ta heqin nuk kam parë, vetëm nëse ikën vetë. Por edhe që të iki vetë nuk kam parë në 34 vite, me përjashtim të Nanos. Është ai që vendos dhe ai thotë se nuk e sheh të arsyeshme të dorëhiqet”.
Por a i njeh Duka zgjedhjet e 11 majit, pasi aleati i tij Berisha po i konteston? Kreu i PAA theksoi se zgjedhjet patën probleme, PD ka pretendime për manipulime, por sipas tij ato nuk mund të ribëhen më. Gabimi sipas tij u bë nga PD me votimin e Kodit Zgjedhor.
“Edhe nëse them të njihen apo të mos njihen zgjedhjet nuk ka peshë. Por jap edhe mendimin tim. Zgjedhjet patën shumë probleme, që nga përdorimi i administratës dhe përdorimi i të fortëve. Duhet shkëputur politika nga krimi. Për mendimin tim është e pamundur dhe e vështirë që zgjedhjet të ribëhen. PD bëri gabim që pranoi Kodin, kam qenë dhe jam kundër dhe nuk e di se si më pranoi PD në koalicion pasi u shpreha hapur për këtë”, u shpreh ai për Report Tv.
Në lidhje me deputetin e zgjedhur nga lista e sigurt e koalicionit për PAA, Duka u shpreh se zgjedhja është e tij, por i sujeronte qëndrimin në opozitë.
“Ai është i lirë, ka mendimin dhe vendimin e vetë. Nëse do më dëgjojë mua, vendi i tij në katër vite është në opozitë. Unë besoj se ai është në të njëjtin mendim me mua. Por nëse ai merr vendim tjetër, unë nuk e respektoj, por nuk bëj dot qëndrim politik sepse nuk jam më deputet”.
Por a e mendonte Duka një rezultat kaq të thellë, edhe pse dyshonte se nuk do e arrinin dot rrotacionin.
“Dyshoja shumë që ta bënim rrotacionin me gjendjen që ishte opozita, por nuk e besoja kurrë një rezultat kaq të thellë. Sepse opozita ka bërë tre gabime thelbësore vetëvrasëse që e kam thënë e më parë, si ndarja administrative, kodi elektoral dhe përçarja e brendshme në PD. Po të kenë qenë gafa edhe falet, por nëse është e qëllimshme, është krim dhe nuk e di. Të falësh 61 bashki, këtë nuk ma kap truri. Rama është shumë i zoti në këtë lloj fushe, është lexues i mirë i kundërshtarit. Me këto tre avantazhe që i fali opozita, por nëse është okulte, kjo do ishte e tmerrshme”, thotë kreu i PAA-së.
A do largohet Duka nga partia?
“Jo, unë do vazhdoj të jem kryetar i PAA-së. Duke parë rezultatin pozitiv në zgjedhjet e 11 majit gjykoj se duhet të vazhdoj detyrën në krye të partisë, pasi ishte rezultat shumë i mirë.Unë e kisha thënë, po të merrnim rezultat të dobët, do largohesha nga drejtimi”, tha ai.
Por a do kalojë PAA në qeveri me Ramën nëse ai do bënte një ftesë.
“Ramës nuk i duhemi ne sepse ka 83 deputetë, që me Tom Doshin mund të shkojë në 86 dhe nuk ka nevojë. Gjithsesi unë nuk mund të flasë për këtë, nëse do ketë ftesë, vetëm atëherë mund të flas. Por mendoj se ka marrë shumë pushtet dhe kjo nuk është gjë e mirë. Ramës nuk i kam bërë mesazh privat për ta uruar dhe si parti do mbaj qëndrimin që po mban opozita, nëse e urojnë ata do e bëj edhe unë politikisht. Por besoj se Rama ka aq shumë urime sa nuk i shkon mendja te mesazhi im, edhe pse ai përgjithësisht i kthen”, tha Duka, duke shtuar se tani nuk do jetë më në politikën aktive, por do merrej me bizneset e tij dhe me një verë të personalizuar së shpejti.
Komente
