Durrës- Grabiste me dhunë varëset e floririt nga qafat e grave dhe vajzave, arrestohet 29-vjeçari i dyshuar me precedentë penalë dhe i dënuar më parë për vjedhje.
Operacioni është koduar “July” (Korriku), kurse i arrestuari është Hasan Zylfa. Policia e Durrësit njoftoi sot se ka dokumentuar 3 nga rastet e denoncuara.
“Si rezultat i punës intensive të specialistëve për Hetimin e Krimeve të Komisariatit të Policisë Durrës, për zbardhjen e vjedhjeve, identifikimin dhe arrestimin e autorëve, u finalizua operacioni policor i koduar “July”, për zbardhjen e disa vjedhjeve me dhunë të kryera gjatë muajit korrik. Në kuadër të këtij operacioni, u arrestua në flagrancë shtetasi H. Z., 29 vjeç, banues në fshatin Rrashbull, për veprën penale "vjedhja me dhunë", bëri me dije policia vendore.
“Vijon puna për dokumentimin e vjedhjeve të tjera që mund të jenë kryer nga ky shtetas”, sqaroi policia më tej.
Policia ndau edhe pamje filmike nga krimet e kryera nga i dyshuari, që do shërbejnë edhe si provë materiale.
Burime zyrtare bënë me dije se materialet procedurale i kaluan Prokurorisë, për veprime të mëtejshme.
Komente
