DURRËS- Një 50-vjeçar është plagosur me thikë në afërsi të stadiumit “Niko Dovana” në qytetin e Durrësit mbrëmjen e kësaj të enjte. Report Tv mëson se i plagosuri, i identifikuar si S.Dh, është gjetur nga kalimtarët e rastit në trotuar i shtrirë dhe i mbuluar nga gjaku. 50-vjeçari ka marrë disa plagë nga goditjet e thikës dhe është dërguar menjëherë në spital për të marrë ndihmën e parë mjekësore.
Autori në polici: Më ngacmoi gruan
Ndërkohë policia identifikoi dhe arrestoi autorin e plagosjes, B.Xh, 36-vjeç, si dhe sekuestroi thikën. Burime nga policia e Durrësit thanë për Report Tv se shkak për ngjarjen ka qenë një sherr i dy personave. Autori i plagosjes mësohet të jetë shprehur përpara policisë se e plagosi 50-vjeçarin për shkak se ai i ngacmonte gruan.
Vijojnë hetimet për zbardhjen e plotë të rrethanave të kësaj ngjarje.
Njoftimi i Policisë:
Durrës
Plagos me thikë një shtetas.
Arrestohet pak minuta pas ngjarjes autori i dyshuar.
Më datë 02.08.2018, rreth orës 20:50, në lagjen Nr.18, për motive të dobëta është goditur me thikë shtetasi S.Dh. 52 vjeç, banues në Durrës, i cili ndodhet në Spitalin Rajonal Durrës nën kujdesin e mjekëve.
Me të marrë njoftim janë organizuar menjëherë Shërbimet e Policisë së Durrësit, të cilët kanë bërë të mundur identifikimin dhe kapjen e autorit të dyshuar, shtetasin B.Xh. 36 vjeç, banues në Durrës. Gjithashtu nën cilësinë e provës materiale është sekuestruar thika. Grupi hetimor po punon për sqarimin e plotë të ngjarjes.
Komente
