Një ngjarje sa absurde aq edhe e rrezikshme ka ndodhur në Kamzë, ku dy adoleshentët teksa lëviznin me një makinë qëllonin në ajër me armë. Kjo është denoncuar nga banorët e zonës, ku policia gjatë operacionit të koduar “Adoleshentët”, arrestuan një 16-vjeçar dhe një 18-vjeçar.
Dy adoleshentë qarkullonin me një armë zjarri me vete dhe qëllonin në ajër, në urën e lumit Çekrez, ku u arrestuan nga policia.
Në pranga përfunduan E. K., 18 vjeç, banues në Kamzë dhe M. K., 16 vjeç banues në Kamzë, i arrestuar dhe i proceduar disa herë për vjedhje, armëmbajtje pa leje dhe dhunë në familje.
16-vjeçari është kapur në flagrancë duke qarkulluar me një armë zjarri pushkë me një krehër me 20 fishekë, së bashku me 18-vjeçarin. Gjatë kontrollit në banesën e 18-vjeçarit u gjet dhe sekuestrua edhe një armë zjarri pistoletë.
Materialet hetimore i kaluan për veprime të mëtejshme, Prokurorisë së Rrethit Gjyqësor Tiranë, për veprat penale “Armëmbajtja pa leje” dhe “Prishja e qetësisë publike”.
