Leonardo Bonucci do prezantohet te Union Berlin në Bundesligë. Pas më shumë se 500 paraqitjeve me fanellën e Juventusit, mbrojtësi do përshëndetet me "Zonjën" dhe Serinë A të futbollit, duke kaluar në Gjermani. I padëshiruar te Juvja, duket se 36-vjeçari ka zgjedhur Berlinin për të vijuar karrierën, kjo edhe për shkak se Union është pjesë e Champions League në edicionin e ri.
Orët e fundit presioni i Union Berlin ka qenë vendimtar, me klubin gjerman që ka kaluar Lazion dhe Genoan, që gjithashtu kërkonin shërbimet e mbrojtësit. Pavarësisht se Bonucci ka edhe një vit kontratë me Juven, ai do kalojë te Union Berlin në mënyrë të përhershme dhe në sezonin e parë paga e tij do paguhet pjesërisht nga Berlini dhe klubi i Serie A.
Veç vitit të parë, në marrëveshjen mes palëve ka edhe një opsion për zgjatjen e kontratës edhe me një sezon. Pas 12 viteve te Juvja, Bonucci do largohet duke takuar shokët e skuadrës dhe për të zhvilluar vizitat mjekësore në ekipin e ri.
