Policia e Elbasanit ka reaguar lidhur me një video të publikuar ditën e djeshme në media ku një kalë ishte lidhur pas një makine në lëvizje.
Ngjarja është regjistruar në Mirakë ndërsa Policia e Librazhdit ka vënë nën hetim shoferin e automjetit, 60-vjeçari me iniciale N. L., për veprën penale “Keqtrajtimi i kafshëve”.
Njoftimi i policisë:
Reagim i Drejtorisë Vendore të Policisë Elbasan
Në lidhje me një video të publikuar në rrjetet sociale, ku shfaqet një kalë i lidhur me litar pas një automjeti në lëvizje, në vendin e quajtur Mirakë, ju informojmë se:
Menjëherë pas publikimit të videos, shërbimet e Komisariatit të Policisë Librazhd kanë kryer veprimet për identifikimin dhe shoqërimin e drejtuesit të automjetit.
Në përfundim të veprimeve procedurale për këtë rast, specialistët për Hetimin e Krimeve të Komisariatit të Policisë Librazhd referuan materialet në Prokurori ku nisi procedimi penal për shtetasin N. L., 60 vjeç, për veprën penale “Keqtrajtimi i kafshëve”.
Drejtoria Vendore e Policisë Elbasan fton qytetarët që të denoncojnë çdo rast të paligjshmërisë në numrin pa pagesë 112 ose në faqen zyrtare të Drejtorisë Vendore të Policisë Elbasan, duke iu siguruar anonimatin dhe reagim të paanshëm kundrejt shkelësve të ligjit.
Komente
