Disa ditë pasi zgjedhjes si kryetar i Kuvendit, Niko Peleshi është takuar me të Ngarkuarën me Punë të SHBA, Nancy VanHorn. Ka qenë ambasada amerikane që ka zbardhur takimin me kryeparlamentarin e ri, duke bërë me dije se diskutuan për përparësitë e Kuvendit dhe fushat kyçe me interes për SHBA.
Pjesë e diskutimeve ishin edhe rritja e shpenzimeve për mbrojtjen, një kërkesë e Donald Trump ndaj vendeve të NATO-s dhe e cila është miratuar, si edhe forcimi i sigurisë. Në një postim në rrjete sociale, ambasada theskon se presin me kënaqësi bashkëpunimin me Kuvendin për objektivat e përbashkëta.
“E Ngarkuara me Punë Nancy VanHorn u takua me Kryetarin e Kuvendit, Niko Peleshi, për të diskutuar mbi përparësitë e Kuvendit dhe fushat kyçe me interes për Administratën Trump, duke përfshirë rritjen e shpenzimeve për mbrojtjen dhe forcimin e mekanizmave të kontrollit të investimeve, me qëllim forcimin e sigurisë dhe mirëqenies për Shtetet e Bashkuara dhe Aleatët e saj. Presim me kënaqësi të bashkëpunojmë me Kuvendin për këto objektiva të përbashkëta.”, thuhet në reagim.
Takimi i diplomates me Peleshin vjen në një kohë kur PD-ja ka kërkuar shkarkimin si kryetar Kuvendi me akuzën se ka shkellur rregulloren dhe kushtetutën. Gjithashtu vjen teksa formimi i komisioneve parlamentare ka mbetur pezull për shkak të mosdërgimit të emrave të anëtarëve nga ana e opozitës.
Postimi i ambasadës së SHBA
Komente
