Kosovë- Një pjesëtar i Policisë së Kosovës u vra me armë zjarri teksa po hynte në banesën e tij.
Sipas policisë ngjarja ndodhi pak para mesnate në rrugën “Idriz Seferi”, Kaçanik.
Oficeri i policisë, Muhamed Lika, nuk mundi të mbijetonte pas plagëve të marra. Ndërkohë autori është ende në kërkim.
"Më 01.04.2025, rreth orës 23:00, kemi pranuar një informacion se një person është plagosur dhe gjendet në gjendje të rëndë në hyrje të ndërtesës së tij, në rrugën “Idriz Seferi” në Kaçanik.Viktima është një pjesëtar i Policisë së Kosovës", tha zëdhënësi i policisë për rajonin e Ferizajt, Kanun Veseli.
Policia vijon me hetimet për zbardhjen e ngjarjes, ndërsa ende nuk ka informacione lidhur me të dyshuarit apo motivet e mundshme të këtij akti kriminal.
Foto:Xhelal Sveçla
Pas vrasjes së oficerit të policisë teksa po hynte në banesën e tij në Kaçanik, ka reaguar edhe ministri i Punëve të Brendshme, Xhelal Sveçla.
Përmes një postimi në rrjetet sociale Sveçla shprehet se vrasja e rreshterit të Policisë së Kosovës Muhamed Lika ka prekur rëndë secilin prej nesh dhe gjithë Policinë e Kosovës. Ndër të tjera Sveçla aplelon që autori/ët të dorëzohen/et para drejtësisë.
Postimi i plotë:
Sulmi ndaj çdo pjesëtari të Policisë së Kosovës është sulm i drejtpërdrejtë ndaj ndaj rendit, institucioneve dhe sigurisë së Republikës së Kosovës.
Vrasja e mbrëmshme e Rreshterit të Policisë së Kosovës Muhamed Lika ka prekur rëndë secilin prej nesh dhe gjithë Policinë e Kosovës. Që nga momenti që kam marrë lajmin jam në komunikim të vazhdueshëm me Policinë, me kërkesën që sa më parë të zbulohet vrasësi dhe të gjitha rrethanat e këtij krimi.
Ftoj dorasin apo dorasit që sa më parë të dorëzohen në organet e rendit, meqë i gjithë aparati shtetëror pa hezitim dhe pa kursim është i mobilizuar të zbulojë dhe arrestojë të gjithë ata që janë përfshirë në këtë vrasje.
Kontributi i Rreshter Muhamedit si në çlirimin e vendit ashtu edhe në garantimin e rendit dhe sigurisë për të gjithë qytetarët tanë, do të mbetet shembull për secilin zyrtar policor në shërbim.
I shpreh ngushëllimet e mia më të sinqerta familjes së Rreshter Muhamedit, zyrtarëve të Policisë së Kosovës dhe të gjithë atyre që e kanë pasur fatin të njohin atë.
U prehtë në paqe në tokën e Republikës sonë të cilës i shërbeu gjithmonë me vullnet e guxim!
Komente
