LEZHË- Një ngjarje e rëndë ka ndodhur në Lezhë, ku policia njofton se dy 19-vjeçarë janë vënë në pranga pasi kishin marrë peng një të mitur dhe e kanë ngacmuar seksualisht. Sipas policisë, ata e kanë marrë 17-vjeçarin pa dëshirë dhe e kanë dërguar me makinë në drejtim të fshatit Kolsh-Malsi.
Në pranga mësohet se kanë rënë Amarildo Gjoka, 19 vjeç, dhe Antonino Lleshi, 19 vjeç. Policia thotë se 19-vjeçarët e kanë shantazhuar 17-vjeçarin me video duke e nxjerrë "Live" në rrjetin social "TikTok" dhe duke e detyruar të përdorë fjalë fyese në video, veprime këto të cilat janë shoqëruar me dhunë fizike ndaj 17-vjeçarit, si dhe e kanë ngacmuar seksualisht.
"Specialistët për Hetimin e Krimit në Komisariatin e Policisë Lezhë bënë arrestimin në flagrancë të shtetasve: Amarildo Gjoka, 19 vjeç, dhe Antonino Lleshi, 19 vjeç, të dy banues Malsi, Njësia Administrative Kolsh, Lezhë.
Arrestimi i tyre u bë pasi një 17-vjeçar bëri kallëzim në Komisariatin e Policisë Lezhë, duke treguar se më datë 21.07.2022, rreth orës 22:30, është marrë në automjet pa dëshirën e tij nga këta dy shtetas dhe është çuar në drejtim të fshatit Kolsh-Malsi, Njësia Administrative Kolsh, Bashkia Lezhë.
Pasi kanë ndaluar automjetin, këta dy shtetas e kanë shantazhuar 17-vjeçarin me video duke e nxjerrë "Live" në rrjetin social "TikTok" dhe duke e detyruar të përdorë fjalë fyese në video, veprime këto të cilat janë shoqëruar me dhunë fizike ndaj 17-vjeçarit, si dhe e kanë ngacmuar seksualisht", njofton policia.
Ndaj tyre rëndëojne akuzat për veprat penale, "Dëmtime të tjera me dashje", "Kanosja" dhe "Ngacmimi seksual".
