Peqin- Një ngjarje e rëndë ka ndodhur në Peqin mbrëmjen e djeshme.
Trupi i një 6-vjeçari u gjet i pajetë buzë lumit në rrjedhën e Shkumbinit, teksa dyshimet e para janë për një ngjarje aksidentale.
Para gjetjes së vogëlushit, rreth orës 19:50, gjyshja e të miturit D.A., ka njoftuar dhe denoncuar se prej tre orësh i kishte humbur nipi i saj 6-vjeçar.
“Menjëherë, shërbimet e Policisë kanë nisur kërkimet për gjetjen e të miturit dhe rreth orës 21:30, kanë gjetur trupin e pajetë të tij, buzë lumit Shkumbin, konkretisht në lagjen “Çezmë”, tha policia vendore.
Gazetari i Report Tv, Ronaldo Gjoshi, informon se nga hetimet paraprake është mësuar se fëmija ka pasur banesën aty pranë lumit dhe për pak momente ka humbur nga vëmendja e gjyshërve të tij. Sapo ka bërë gjyshja denoncim në Polici, kanë nisur edhe kërkimet dhe trupi pas tre orësh është gjetur i pajetë në lumin Shkumbin. Fëmija ka qenë pikërisht duke luajtur aty kur ndodhi ngjarja e rëndë.
Gjatë këqyrjes paraprake të trupit të të miturit, nuk janë konstatuar shenja dhune dhe nga hetimet e deritanishme, dyshohet se ai është mbytur në lumë.
Materialet procedurale iu referuan Prokurorisë së Elbasanit, me qëllim vlerësimin juridik të rastit.
Komente
