Detaje të reja dalin në sipërfaqe në lidhje me zhdukjet e 19-vjeçares me origjinë shqiptare, Artemis Vasilis në Greqi.
Në emisionin “Dritë në fund të tunelit”, një hetues në fushën elektronike, Vassilis Georgopoulos, i cili ka marrë autorizimin nga familja e 19-vjeçares, ka zbuluar se në email-in e saj janë fshirë të dhëna të cilat mund të ishin të dobishme në hetimin e rastit të Artemis.
“Familja e Artemis, më autorizoi të hetoj dy adresat e postës elektronike dhe një tabletë të përdorur nga Artemisa, në mënyrë që të gjej gjurmët e saj. Vajza e kishte lidhur celularin me email-in e saj. Unë zbulova se dikush fshiu të gjitha gjurmët elektronike nga llogaria e saj, të gjitha të dhënat që kanë qenë të rëndësishme për hetimin,” tha ai.
Lidhur me pyetjen nëse këto të dhëna mund të kthehen, ai tha se duhet të veprojnë urgjentisht organet kompetente të Policisë.
Kërkimet për vajzën e re me origjinë shqiptare po vazhdojnë edhe nga grupe vullnetare që janë organizuar në nëngrupe dhe mundohen të zbulojnë të dhëna të reja.
Historia e zhdukje së Artemis, ka nisur 5 muaj më parë, mëngjesin e 16 tetorit e cila doli nga shtëpia për të bërë një intervistë pune nga e cila nuk u kthye më kurrë.
Autoritet greke janë ende në kërkim të gjurmëve të reja të vajzë së humbur duke u mobilizuar me çdo mënyrë për gjetjen e saj.
