Berisha deklaroi dje se Rama përdori gjysëm miliard euro nga paratë publike për të marrë votat që mori më 11 maj.
Por koalicioni i Ramës më 2009 (kur ishte në opozitë) mori po kaq vota sa mori brenda vendit sivjet. Pra, votat që merr koalicioni i Ramës nuk varen shume nga qenia e tij në pushtet.
Po si mund te shpjegohet kjo qëndrueshmëri elektorale?
Le ta fillojmë analizën me zgjedhjet e para pluraliste të marsit 1991.
Në ato zgjedhje, PPSH (paraardhësja e PSSH) mori 2/3 e votave, por u detyrua shpejt të pranonte zgjedhje të parakohëshme, ngaqë nuk e mbante dot më pushtetin 47-vjeçar.
Në zgjedhjet e parakohëshme (mars 1992), PSSH mori vetëm 1/3 e votave. Gjë që tregon se shumë nga anëtarët e familjeve që e kishin përkrahur për 47 vjet ishin zhgënjyer më së fundmi me të.
Por ata u zhgënjyen shpejt edhe me pushtetin e Berishës. Në referendumin e 1994, ku Berisha kërkoi personalisht votën e shqiptarëve për kushtetutën që donte ai, vetëm 41% votuan pro. Anëtarët e familjeve që kishin përkrahur PSSH në dekadat e mëparshme e abandonuan në masë Berishën...
Tragjedia e skemave piramidale e thelloi edhe më tepër ndarjen elektoratit shqiptar në dy pjesë - pakica që i mbeti besnike PD-së së Berishës dhe shumica që u grumbullua në sinorin e PSSH-së.
Qysh nga 1997-a e këtej elektorati i PSSH-së ka mbetur shumicë, pavarsisht përçarjeve Nano-Meta e Rama-Meta, që i dhanë mundësinë Berishës të qeveriste nga 2005 deri më 2013.
Nga 2013-ta e këtej, koalicioni i majtë i udhëhequr nga Rama është stabilizuar rreth 800 mijë votave, ndërkohë që koalicioni i PD-së është luhatur mes 470 mijë dhe 620 mijë votave. Më 11 maj mori vetëm 530 mijë vota (duke përfshirë edhe votat nga diaspora dhe votat e ish-LSI-së).
Komente
Përveç vitit ‘92, PD nuk ka fituar kurrë në Shqipëri. Dhe kjo është shumë thjeshtë e shpjegueshme. Si PD ashtu edhe partitë para çlirimit kanë mentalitet feudalist. Mirëpo feudalist “dje” në shek XX, feudalistë përsëri “sot” në shek XXI, nuk ka komb që e pranon. Dhe për t’i vendosur vulën ishte periudha gjatë Luftës së Dytë Botërore ku forcat e djathta arritën deri aty sa të bashkëpunonin me pushtuesin vetëm për të mbajtur pushtetin. Por populli nuk i harron lehtë padrejtësitë që i bëhen. Edhe pse u tentua tu jepej një mundësi forcave të djathta pas viteve ‘90, zhgënjimi ndodhi shpejt sepse PD si përfaqësuese e së djathtës së re shqiptare, mbajti të njejtin kod gjenetik si partitë e djathta të para dhe gjatë luftës. Dhe ky është shpjegimi se përse PD nuk ka pasur ndonjëherë simpati në popull. Edhe në periudhën e qeverisjes 2005-2013 PD erdhi në pushtet vetëm si rrjedhojë e përçarjes së PS që u krijua LSI, dhe erdhi në pushtet edhe si rrjedhojë e mekanizmave elektoralë të sistemit zgjedhor të asaj kohe. Duhet thënë që edhe kur PD erdhi në pushtet në 2005, edhe kur e vazhdoi në 2009, vota kombëtare ishte përsëri në favor të PS.
Përgjigju