Antalia, Turqi - Prishtina është fituese e Superkupës së Kosovës në futboll. Djemtë e Emmanuel Egbosë mposhtën 2-1 kampionët e Ballkanit dhe kështu ngrejnë trofeun e parë për këtë vit.
Në Turqi, Prishtina shënoi që pas nëntë minutave lojë. Ishte Sinani që i dha epërsinë bardhekaltërve, teksa Kryeziu në pjesën e dytë shënoi golin e qetësisë. Skuadra e Ilir Dajës shkurtoi gjithçka me Dulaj në të 79 minutë, por goli shërbeu sa për statistika.
Pas ndeshjes trajneri Egbo u shpreh i lumtur për këtë sukses të të tijve, duke kujtuar se trajnon në klubin më të madh në Kosovë.
"Është kupa e parë e fituar që kur erdha në Kosovë te Prishtina. Kjo është kupë psikologjike dhe u kam thënë lojtarëve që duhet ta fitojmë patjetër, sepse Prishtina është klubi më i madh në Kosovë. Prishtina në çdo garë futet për të fituar", tha Egbo pas ndeshjes.
