RROGOZHINË - Partizani fitoi 0-1 kundër vendasve të Egnatias për aktin e parë gjysmëfinale të Kupës së Shqipërisë në futboll. Në stadiumin e Rrogozhinës, të kuqtë fituan kundër kampionëve në fuqi dhe janë një hap më pranë finales, por do jetë sfida e kthimit më 23 prill ajo që do vendos ekipin që do marrë biletën për finale.
Ndeshja nisi në ekuilibër, ndërsa tifozët në "Arenën Egnatia" të rinovuar i dhanë bukuri takimit. Padyshim cilësitë që Egnatia ka në ekip bënë që vendasit të kishin disa raste, por pjesa e parë u mbyll me rrjeta të paprekura.
Në fraksionin e dytë trajnerët Tetova dhe Gega bënë disa lëvizje dhe pikërisht goli erdhi nga stoli. Albers Keko përfitoi nga penalltia e fituar nga Partizani dhe e ktheu në gol, duke i dhënë të tijvë më shumë besim për ndeshjen e kthimit.
Trajneri i "Demave", Skënder Gega, i cili ka vetëm pak ditë në stolin e Partizanit vlerësoi grupin e kundërshtarëve.
"Duhet vlerësuar çdo lloji ekipi, por Egnatia ka kualitet. Nuk mund ta bëjmë të bardhën të zezë, Egnatia ka lojtarë me eksperiencë, gjë që ne na mungon. Përveç Alban Hoxhës lojtarët e tjerë janë të rinj.
Duke parë edhe shkallët e vështirësië, jam shumë i kënaqur nga ekipi, nga mënyra si interpretuan. Gabimet nuk shmangen, por disiplina dhe sakrifica më bëjnë që të ndihem mirë për ekipin.
Finalja - Ka mbaruar vetëm akti i parë. Një pjesë e parë e mirë, por asgjë nuk ka mbaruar. Mund të mendosh se kontrollon lojën në fushën tënde… Kjo iku, kemi kohë për të menduar. Kemi 22 lojtarë, por ka disnivele. Sot u mundova të aktivizoj një mesfushor të ri, Mintongo, pasi ka 3 ditë që e kam parë. Më pëlqeu fizikisht, normal që shfaq probleme kur lodhesh", tha Gega mes të tjerash.
Komente
