ReportTv mëson ekskluzivisht nga burime pranë komisionit të ligjeve se prokuroria e posaçme ka depozituar dy kërkesë me anë të së cilës hetuesit kërkojnë shtesën e pagës prej 60% për vështirësi në punë dhe privimin e lirive e privatësisë së familjarëve të tyre.
Dy shkresat rezultojnë se në sirtarët e parlamentit janë prej Janar 2020 dhe 30 Maj 2020 por ende nuk ka një vendim që hetuesit të përfitojnë shtesën e kërkuar.
ReportTv ka mundur të lexojë shkresën në të cilën SPAK thotë: “Të heqësh dorë nga privatësia për vete dhe familjarët e afërm, është një kufizim drastik i të drejtave të individit. Ky kufizim i të drejtave individuale vlerësuar nga ligjvënësi si i domosdoshëm për të garantuar objektivat e ligjit dhe njëkohësisht si kusht skualifikues për kandidatët që nuk e plotësonin. Për të baraspeshuar këtë kufizim të të drejtave individuale ligjvënësi ka parashikuar që të ketë pagesë shtesë", shprehet SPAK.
Struktura e posaçme kundër krimit dhe korrupsionit shprehet se shtesa e pagës nxit aplikimin e kandidatëve më të mirë jo vetëm për prokuror, por edhe për byronë kombëtare të hetimit dhe administratën e punonjësve civil.
Një tjetër kërkesë e SPAK është edhe përcaktimi i pagës së kreut të byrosë kombëtare të hetimit e cila deri më tani në mënyrë të çuditshme nuk është përcaktuar kurrë as në ligjin 95/2019 as në ligjin 25/2019.
Shkresa e depozituar në kuvend kërkon nga deputetët të miratojnë një pagë për drejtuesin e byrosë kombëtare të hetimit sa ajo e prokurorit të SPAK në nivelin bruto me shtesën për vjetërsi si magjistratët, 10% shtesë për postin e drejtuesit si dhe shtesë për vështirësi në nivelin e 50% të pagës bruto fillestare.
Aktualisht paga për hetuesit e SPAK është në nivelet e 170 deri në 190 mijë lekë por mos marrja e shtesës që nga nisja e punës, për hetuesit të cilët nuk pranuan të flasin me kamera është një demotivim për ta.
Por çfarë ka ndodhur me pagën e hetuesve të SPAK?
Me propozim të tre deputetëve Adnor Shameti, Alket Hyseni dhe Edmond Leka parlamenti e miratoi në 12 shkurt shtesën e pagës për vështirësi dhe privim privatësi të prokurorëve të SPAK duke e inkorporuar në ndryshimet e propozuara në formulën e betimit të gjyqtarëve e prokurorëve.
Por me anë të dekretit numër 11444 presidenti Meta e ktheu pas këtë ligj me argumentin se është pro rritjes së pagës për prokurorët por kundër formulës së re të betimin e cila sipas tij ishte cenim i kompetencave të presidentit.
Nga ky moment ligjvënësi ende s’ka gjetur një zgjidhje teksa prokurorët kërkojnë pagesën siç dhe ata kanë rënë dakord para se të merrnin këtë detyrë.
Kthimi dhe arsyetimi i kthimit të ligjit
