Një gjurmë e gishtit të mesëm të dorës së majtë lënë në furgonin me mbishkrimin “Hetimi Tatimor” ka zbuluar Alkond Bengasin, të arrestuar si bashkëpunëtor në grabitjen e ndodhur më 9 prill në aeroportin e Rinasit, tashmë të kthyer në të penduar dhe bashkëpunëtor të drejtësisë që me dëshminë e tij ka zbërthyer thuajse të gjithë grupin kriminal dhe rolet e tyre. Nga dokumentet që disponon Shqiptarja.com gjurma e gishtit është parë me sy të lirë nga ekspertët pasi kanë hapur pasqyrën e vogël e vogël në furgon në anën e pasagjerit që është e vendosur në pajisjen për t'u mbrojtur nga dielli.
Foto ilustruese, ku është gjetur gjurma e gishtit të Alkond Bengasit
Grabitësit janë tradhtuar pikërisht nga kjo gjurmë gishti, e parë me sy të lirë nga ekspertët e laboratorit të policisë Shkencore, të cilët pasi e kanë ç’montuar, kanë filluar të kryejnë krahasimin e gjurmës së gishtit me gjurmët e tjera që kanë të arkivuara në sistem. Sipas materialit që disponon “Shqiptarja.com” thuhet se gjatë kqyrjes së automjetit me targë AA 248 KE, ndër të tjera ka rezultuar se në perden e diellit të anës së djathtë është konstatuar me sy të lirë gjurma daktilospkopike. Nëpërmjet aktit të ekspertimit të kryer dy ditë pas grabitjes, në 11 prill 2019 ka rezultuar se: “…në objektin e ekspertimit, fiksuar si provë materiale gjatë kqyrjes së vendit të ngjarjes, u përftua një gjurmë papilare e vlefshme për identifikim e cila u shënua me germën “A”.
Gjurma ndodhet në sipërfaqen e pasqyrës së mekanizmit që shërben t'u mbrojtur nga dielli. Ajo nuk mund të caktohet se nga cili gisht është formuar dhe është e vlefshme për krahasim në rreth të kufizuar personash. Ndërkohë që kjo gjurmë i është nënshtruar dhe një ekspertimi të dytë, dhe më konkretisht në datën 19 prill 2019 ekspertët kanë dalë në përfundimin se:”…gjurma është objekt ekspertimi e fiksuar në vendin e ngjarjes vjedhje me armë, datë 9 prill 2019 në Rinas është formuar nga gishti i mesit, i dorës së majtë të shtetasit Alkond Ferdinand Bengasi (Qevani)". Nisur nga këto kushte prokuroria ka urdhëruar arrestimin e Bengasit e bashkë me të edhe të Saimir Çelës, e Roland Sulës. Nga transkriptimi i përgjimeve ambientale mbajtur në Drejtorinë e Policisë së Tiranës, përgjithësisht rezulton se personat nën hetim janë munduar që të tregohen të kujdesshëm në komunikimet e tyre. Por megjithatë, është një bisedë, të cilën prokuroria e evidenton:
Datë 20.04.2019
Saimir Çela: Çfarë tersi, e disha.
Renaldo: Ë... Ej, e kanë marrë vesh ata?
Datë 21.04. 2018
Renaldo: Qysh t'ia bëjmë, qysh t'ia bëjmë ëëë, do paguajnë ato k..., do e hamë keq, do e hamë keq...
Saimiri: Mos thuaj gjë...
Rezulton se ata janë të shqetësuar, ku Saimir Çela tregon se ju ndodhi ters, por e kishte parandjerë. Renaldo në bisedime nënkupton se e kanë marrë vesh ata (me shumë siguri personat e tjerë në hetim, organizatorët e kësaj ngjarje). Ai edhe i ankohet Saimir Çelës, se si t'ia bënin tani që ishin ndaluar, dhe se do të paguajnë ato k...(duke ju referuar edhe këtu me shumë mundësi organizatorëve), si dhe frikën që kishin se ata tashmë e kanë pësuar.
Lista e provave, çfarë ju sekuestrua Admir Muratajt
Teksa disa nga anëtarët e grupit të Admir Muratajt kishin arritur të hynin brenda në pistën e aeroportit të Rinasit dhe të grabisnin prej andej, shumë e 5.7 milion euro, në ikje e sipër ata janë ndjekur nga një patrullë policie dhe gjatë shkëmbimit të zjarrit u vra Admir Murataj. Në trup e afër tij janë gjendur:
1.Një granatë dore e montuar me ndezës dhe sigurues të vendosur në të
2.Dy granata tymuese
3.Një pistoletë e kalibrit 7.62 mm model 54 me nr.200101
4.Tre krëhëra pistolete të mbushura me fishekë
5.Një armë zjarri e llojit automatik model 56 me krëhër të vendosur dhe fishekë në fole
6.Katër krëhëra të tjerë automatiku të mbushura me fishekë
7.Një fishek model 56 i pa plasur
8.Gjashtë gëzhoja armë zjarri model 56
9.Dy palë gërshërë për prerje hekuri
10.Një aparat me ngjyrë të zezë që shërben për bllokimin e valëve të telefonit.
11.Një aparat telefonik
12.Një automjet Furgon
13.Një maskë plastike
