TIRANË- Transaksione të dyshimta me pasuritë e paligjshme, shitje blerje apatamentesh nga mamaja pensioniste, dhe 5 emrat e përdorura ndër vite. Shqiptarja.com dhe Report Tv, zbulojnë të dhëna të reja rreth sipërmarrësit Kristian Koni, 35 vjeçar, të cilit një ditë më parë iu sekuestruan prona e vila luksoze në komplekse rezidenciale në zonat më të shtrenjta të Tiranës, apo dhe në bregdetin e Jugut, në zonën e Palasës. Vlera totale e tyre, sipas policisë shkonte mbi 26 milionë euro. Ndaj Konit veproi i ashtu quajturi ligji Antimafia. Në fund të viteve 2000, ai rezulton të ketë qenë, sipas autoriteteve pjesë e grupi kriminal që merrej me trafikun e drogës në Itali, ku dhe është arrestuar e dënuar.
Shqiptarja.com dhe Report Tv kanë siguruar vendimin për sekuestron e pasurive të Kristian Konit, në të cilin tregohet me detaje rasti i blerjes së një vile luksoze në Rolling Hills, me një çmim disa herë më të ulët se vlera. Në dosje listohen 18 pasuritë që i janë sekuestruar Kristian Konit, nënës së tij Fitnete Meta, apo në emër të shoqërisë “Kriol.Al” në pronësi të vetë 45-vjeçarit.
Për Konin dhe të ëmën e tij “janë ngritur dyshime të arsyeshme se veprimtaria e tyre ka si burim pasuri me origjinë kriminale, që lidhet ngushtësisht me shtetasin Kristian Koni dhe historikun e tij të mëparshëm penal”, thuhet në vendim.
Vila në "Rolling Hills 2" për 300 mijë euro
“Sipas të dhënave të administruara, shtetasi në fjalë rezulton i përfshirë në disa transaksione me elementë anomalie, në fushën e shitblerjes së pasurive të paluajtshme dhe të luajtshme”, thuhet në dosje. Rasti i blerjes për 300 mijë euro, të një vile me 3 kate dhe sipërfaqe totale ndërtimi 391.1 m², e pajisur me pishinë nga pronari i Pelicani Security, Vesel Demiraj, ka ngritur pikëpyetje të forta për autoritetet.
“Lidhur me historikun e kësaj pasurie, rezulton se pala premtuese-shitëse, shtetasi Vesel Demiraj, e kishte porositur këtë vilë nëpërmjet kontratës së sipërmarrjes nr. 1440 rep. / nr. 1053 kol., datë 14.04.2021, të lidhur me shoqërinë "AS Construction" sh.p.k.. Sipas kësaj kontrate, çmimi i dakordësuar për pasurinë e sipërpërmendur ishte 808,000 euro, me pagesë në disa këste.
Fillimisht palët kishin rënë dakord që Koni do ta blinte vilën për 280 mijë euro. Në momentin e lidhjes së kontratës së premtim-shitjes me Kristian Konin, pala shitëse ende nuk kishte përfunduar likuidimin e detyrimeve për blerjen e kësaj pasurie”, thuhet në dosje.
Dhe më datë 18.03.2024, palët revokojnë kontratën me arsyetimin se pala premtuese e blerjes nuk kishte përmbushur detyrimet kontraktuale. Por pak më vonë nënshkruajnë një kontratë të re dhe Koni do ta blinte vilën për 300 mijë euro, dhe pagesa do të kryhej brenda 30 ditëve, kur Demiraj të pajisej me certifikate pronësie dhe Koni të shlyente çmimin e plotë të pasurisë.
Pasuria është blerë në emër të shoqërisë "Kriol.Al" sh.p.k., e administruar nga Kristian Koni. Në dosje thuhet se “shoqëria është përfshirë në një transaksion për blerjen e kësaj pasurie me një çmim dukshëm më të ulët (300,000 euro) se sa çmimi fillestar i porosisë nga Vesel Demiraj (808,000 euro).”
Pagesa sipas marrëveshjes parashikonte 202 mijë euro brenda 10 ditëve nga nënshkrimi i kontratës dhe 98 mijë të tjera në një ose disa këste dhe në momentin e nënshkrimit të kontratës përfundimtare. Sidoqoftë, vila i kalonte Konit që pas kryerjes së pagesës së 202 mijë eurove.
Po ashtu, në dosje evidentohet se Kristian Koni ka kryer një numër të konsiderueshëm transaksionesh për shitblerje pasurish të luajtshme gjatë periudhës 2013-2024.
Vila e sekuestruar në Rolling Hills
Nëna pensioniste shiste e blinte apartamente
Edhe pse figuron si pensioniste, Fitnete Meta ka rezultuar e përfshirë në një sërë transaksionesh pasurore që kanë ngritur dyshime për autoritetet.
Më 13 shtator 2014, ajo i shiti një personi, E.D një apartament me sipërfaqe 124.6 m² në Farkë, Tiranë, për 50 mijë euro. Pagesa nuk u krye në momentin e kontratës, por u konsiderua si shlyerje e një detyrimi që Meta kishte ndaj tij prej vitit 2012.
Vetëm disa javë më pas, më 4 nëntor 2014, Fitnete Meta bleu një apartament prej 79.51 m² në Rrugën e Barrikadave nga kompania “Ndërtim Vila Co” sh.p.k., për çmimin 54 mijë euro. Në kontratën noteriale u deklarua se pagesa ishte bërë jashtë zyrës së noterit.
Më 22 tetor 2018, ajo shiti të njëjtin apartament dhe një garazh prej 12.5 m², për një vlerë ndjeshëm më të lartë, prej 10.8 mln lekë të reja dhe pagesa është kryer përmes llogarisë bankare.
Më 23 dhjetor 2019, Fitnete Meta porositi një apartament dhe një vend parkimi me vlerë totale 199 mijë euro. Pagesa u parashikua të bëhej me këste me të ardhura të gjeneruara nga shitja e mëparshme e apartamentit dhe garazhit në Tiranë.
I dyshuar për lidhje me Camorran me 5 emra
Për t’i shpëtuar aktivitetit kriminal, Kristian Koni ka përdorur 5 emra, dy prej të cilëve të çuditshëm dhe jo shqiptarë. Deri në vitin 2009 ai ka mbajtur emrin e lindjes, Olsi Meta. Por në maj të këtij viti, ka ndryshuar emrin, nga Olsi në Kristian, dhe në janar të vitit 2012, ndryshon dhe mbiemrin, nga Meta në Koni, duke marrë mbiemrin e nënës.
Sipas dosjes ai rezulton të ketë përdorur dhe dy identitete të tjera, Zdanaivicius Ramunas (lindur më 28.07.1980) dhe Kelys Zydrunas (lindur më 29.04.1987).
Kristian Koni rezulton i përfshirë në aktivitet kriminal për veprën penale "Trafik droge" gjatë periudhës 2007–2012 në Itali dhe i lidhur me organizatën mafioze të Camorras. Sipas dosjes hetimore të asaj periudhe, organizata kriminale eksportonte marijuanë e kokainë nga Spanja, Holanda dhe Shqipëria, të cilat i dërgonin më pas në Itali, dhe që si bazë të operacioneve të tyre kishin zgjedhur zonën e Puglias dhe të Barit.
Kompania “Kriol.al” dhe depozitat cash në llogari bankare
Nga të dhënat zyrtare rezulton se Kristian Koni është pronar i shoqërisë “Kriol.al” sh.p.k., e cila gjatë periudhës 2022–2023 ka deklaruar fitime pozitive. Vetëm në vitin 2022, kompania ka realizuar fitim pas tatimit prej 29.3 milionë lekësh, ndërsa në vitin 2023 rezulton me 5.3 milionë lekë, dhe në vitin 2024 me 1.1 milionë lekë.
Kompania ka realizuar një volum të madh transaksionesh, përfshirë bashkëpunim me kompaninë polake “Redenberg S.P.” në vlerën e rreth 96 milionë lekëve, si dhe blerje nga shoqëri shqiptare.
Edhe pse shoqëria ka qarkulluar shuma të mëdha, ajo nuk ka pasur të punësuar të tjerë përveç administratorit Koni. Të ardhurat e tij personale nga paga llogariten në rreth 2.6 milionë lekë bruto.
Nga të dhënat doganore, Koni ka kryer vetë, 23 procedura importi si individ, ndërsa “Kriol.al” rezulton me 3 procedura importi dhe 12 procedura eksporti. Pavarësisht këtyre lëvizjeve, nuk ka deklarime për para cash, metale apo sende të çmuara gjatë kalimeve doganore në periudhën 2004–2025.
Në këtë skemë figuron edhe e ëma Fitnete Meta, e regjistruar si person fizik me aktivitet tregtar të gjerë (produkte industriale, ushqimore, konfeksione, fruta-perime, kozmetike, elektronike, mobilje, bar-kafe). Subjekti i saj, i regjistruar në Ndroq, Tiranë, ka status aktiv dhe ka deklaruar fitime të vogla, nga 91 mijë lekë deri në 451 mijë lekë në vit.
Megjithatë, të dhënat bankare të përbashkëta për Konin dhe Metën tregojnë lëvizje financiare të konsiderueshme, ku shpeshherë depozitohen shuma të mëdha në para cash, element që ngre pikëpyetje mbi burimin real të fondeve./Shqiptarja.com
Klikoni linkun per dokumentin e plotë
Komente
