Elbasan- Ushtronin prostitucion në një apartament të marrë me qira në lagjen “5 Maji”, arrestohen 2 gra nga Kazakistani.
Policia finalizon operacionin policor të koduar "Booking", procedohet penalisht edhe pronarja e apartamentit. Sekuestrohen shuma parash në valuta të ndryshme, 3 celularë dhe dokumentet e 2 të arrestuarave.
Të ndaluarat janë A. A., 34 vjeç dhe A. A., 27 vjeç, kurse në gjendje të lirë u procedua R. Ç., 42 vjeçe, banuese në Elbasan.
Burime zyrtare bënë me dije se rreth 1 javë më parë, Policia e Elbasanit zbuloi dy apartamente të tjera të marra me qira nga gratë e huaja, për të ushtruar prostitucion.
“Specialistët e Seksionit për Hetimin e Trafiqeve, si rezultat i një hetimi të kryer me metoda proaktive, në drejtimin e Prokurorisë, për goditjen e një rasti të ushtrimit të prostitucionit, finalizuan operacionin “Booking”, gjatë të cilit u zbulua apartamenti në lagjen “5 Maji”, ku kryhej kjo veprimtari”, njoftoi policia vendore.
Nga veprimet hetimore rezultoi se dy gratë e huaja ushtronin prostitucion në apartamentin e marrë me qira nga 42-vjeçarja.
Materialet procedurale iu referuan Prokurorisë së Elbasanit, për veprime të mëtejshme.
Komente
