Elbasan-Këshilli Bashkiak i Elbasanit nuk e votoi projektvendimin e bashkisë për ndërtimin e një landfilli të ri, pasi sipërfaqja në landfillin aktual, i cili ndodhet te inceneratori, është ezauruar.
Mbledhja u shoqërua me debate, ku demokratët akuzuan se bashkia e ka një kontratë aktualisht për pranimin, depozitimin dhe trajtimin e mbetjeve edhe pse impianti është jashtë funksionit.
Ndërsa këshilltarët e PS-së që kanë shumicën në këshill kërkuan qe kontrata të bëhet më e detajuar me kompaninë Eco-Elb. Nënkryetari i Bashkisë së Elbasanit Asim Sula u shpreh se do të meren parasysh sugjerimet dhe kontrata do të vijë e detajuar në mbledhjen e ardhshme të këshillit.
Po në mbledhjen e këshillit u mësua se Prokuroria e Elbasanit ka nisur hetimet për kompaninë Eco-Elb edhe pse nuk ka një njoftim zyrtar. Burimet nga organi i akuzës konfirmuan se është regjistruar procedimi penal për veprat penale “Shkatërrim i Pronës me zjarr” dhe “Ndotje e ajrit”, lidhur me një zjarr që shpërtheu në landfillin e kësaj kompanie në korrik 2023.
Prokurori Xhelian Seferi ka zgjeruar hetimin edhe për shpërdorim detyre nga ana e kompanisë publike, duke përfshirë më gjerësisht shkeljet e mundshme.
Komente
