Rënia e lindshmërisë, plakja e popullsisë si dhe emigrimi do të shtojnë ‘vuajtjet’ për punonjës për bizneset dhe nga ana tjetër do të rrisë kostot për buxhetin e shtetit pasi deficiti i skemës së pensioneve do të rritet.
Ky është paralajmërimi i bërë nga Banka e Shqipërisë për privatin dhe shtetin, i pasqyruar në raportin vjetor të 2024-ës në një analizë dedikuar prirjeve demografike në Shqipëri dhe ndikimeve që do të kenë në ekonomi.
“Ndikimi i tkurrjes së numrit dhe i plakjes së popullsisë do të jetë një faktor gjithnjë e më kufizues në tregun e punës në horizontin afatgjatë”, thuhet në analizë.
Banka e Shqipërisë rekomandon të merren masa për të mbrojtur skemën e pensioneve, e cila në mungesë të rritjes së kontribuuesve mund të përballet me thellim të deficitit.
Tre masat kryesore që propozon Banka e Shqipërisë kanë të bëjnë me dekurajimin e emigrimit duke u fokusuar edhe tek rekrutimet e punonjësve të huaj nëse është e nevojshme. Së dyti duhet të nxitet produktiviteti përmes investimeve në teknologji, edukim apo trajnim të stafit dhe së fundmi të studiohet me përparësi reforma e sistemit të pensioneve, si mënyrë për të rritur qëndrueshmërinë fiskale.
“Ashtu si dhe me treguesit e punësimit, trendet e pafavorshme demografike sugjerojnë një rritje të mundshme të këtij deficiti, në mungesë të ndërhyrjeve”, thuhet në analizë.
Edhe pse ekonomia thotë banka qendrore është më produktive se vite më parë ende është larg standardeve të BE-së, dhe ndodhet në një territor jo të favorshëm për shkak të problemeve demografike. Kjo analizë është bazuar në rezultatet e CENS-it të vitit 2023, që konfirmoi rënie me 420 mijë të popullsisë së vendit në krahasim me vitin 2011, si dhe plakje me 7.2 vite, pasi mosha mesatare u rrit në 42,5 vjeç.
Komente
