I frymëzuar nga historia e bunkerit të shndërruar në Kishë nga banorët në Lin të Pogradecit, artisti Ardian Isufi ka çuar këtë histori të jashtëzakonshme para publikut italian.
Përmes ekspozitës “Ëndrra Metalurgjike” në Bari në ambientet e teatrit Kursaal Santalucia, Isufi ka shfaqur këtë instalacion i cili ka tërhequr vëmendjen e artdashësve dhe mediave italiane.
Ekspozita ka hapur dyert me datë 17 shkurt dhe do qëndrojë deri më 30 mars. Është hera e parë që punimet e artistit dhe pedagogut të arteve Ardian Isufi që ekspozohen në Itali.
Në ekspozitë shpalosen Industritë e pashfrytëzuara nga periudha komuniste të shndërruara në parqe argëtimi, oxhaku i një ish-fabrike xhami industriale të ripërdorur në minaren e një xhamie, bunkerët e lashtë ushtarakë.
Por nuk kanë munguar as pikturat, video dhe fotomontazhe, skulptura, madje edhe në lëvizje. Ky projekt i promovuar nga Rajoni i Pulias, ka për qëllim forcimin e shkëmbimeve në fushën e artit midis dy brigjeve të Adriatikut.
