Në prag të nisjes së Europianit Franca ka treguar se jo më kot është favoritja numër një për ta fituar. Në testin miqësore kundër Uellsit ‘gjelat’ kanë fituar me rezultatin e pastër 3-0, ndërsa Benzema, i rikthyer në kombëtare pas 6 vitesh humbi edhe një penallti.
Ndaj kundërshtarëve që dy ditë më pas do të luajë edhe Shqipëria, Franca zhbllokoi në minutën e 35 më Kylian Mbappe. Më tej kampionët e botës realizuan edhe dy herë të tjera me Griezman që la shenjë falë një eurogoli dhe më pas Dembele, i cili stampoi shifrat përfundimtare.
Ndërkohë edhe pse me rezultatin 1-0 Anglia ka treguar se është në formë në prag të Euro 2020. “Tre Luanët” kanë mposhtur Austrinë falë 19-vjeçarit Bukayo Saka, i cili ishte i ftuar për herë të parë nga kombëtarja. Gol inga mesfushori i Arsenalit u realizua në minutën e 57 të takimit.
Ndryshe nga Franca dhe Anglia, Gjermania ka ngecur me rezultatin 1-1 ndaj Danimarkës. Katër herë kampionët e Botës realizuan të parët me Neuhaus, ndërsa miqtë barazuan me Poulsen në minutën e 71. Ashtu si Gjermania edhe Holanda nuk ka shkuar më shumë se 2-2 kundër Skocisë. Miqtë britanikë kaluan në dy raste në avantazh, por tulipanët arritën të baraspeshonin me Depay-n, i cili realizoi ‘dopietë’.
Ne.k.//ReportTv.al