PRISHTINË - Kosova dhe Zvicra në futboll luajnë sot për grupin I kualifikues të Euro 2024. Duke nisur nga ora 20:45 në "Fadil Vokrri", Granit Xhaka dhe Xherdan Shaqiri do jenë kundër skuadrës së shtetit të tyre. Për herë të parë në një duel të tillë në Prishtinë, dyshja nuk i ka fshehur emocionet në përballjen kundër "Dardanëve".
Në konferencën zyrtare për mediet, Granit Xhakës i është kërkuar nga gazetarët nëse do "zgjaste dorën për një barazim". Kapiteni i "Helvetëve" ka shpërthyer në të qeshura, duke thënë se nuk ka koment.
"Nuk ka koment, nuk ka", thotë Xhaka që vijon sërish të qesh pas kësaj pyetje. Nga ana tjetër, Xherdan Shaqiri është shprehur i emocionuar për këtë duel, teksa ka siguruar 50 bileta për familjarët që do jenë të pranishëm në "Fadil Vokrri".
"Ishte gjithmonë ëndërr që të luaj një herë në Kosovë aty ku kam lindur. Do ta shijoj çdo sekondë", ka shkruar Shaqiri në një postim në ‘Instagram’.
