EUROPOL ka goditur një rrjet të gjerë kundër shfrytëzimit seksual të të miturve. Kidflix, një nga platformat më të mëdha të pedofilisë në botë, është mbyllur pas këtij operacioni ku u përfshinë 35 shtete, mes tyre edhe Shqipëria. 79 persona kanë rënë në pranga, ndërsa i përfshirë në këtë rrjet, sipas Policisë së Shtetit rezulton edhe një shqiptar, i cili është identifikuar, por ende nuk është vënë në pranga.
Policia e Shtetit, njoftoi se ka referuar materialet në Prokurorinë e Tiranës dhe është regjistruar hetimi për veprën penale “Pornografia”, me të mitur për një 29-vjeçar banues në Tiranë. Blutë kanë ushtruar kontroll në banesën e tij dhe kanë sekuestruar 3 celularë dhe 1 laptop.
"Si rezultat i veprimeve hetimore dhe procedurale të kryera nga Drejtoria për Hetimin e Krimeve Kibernetike dhe Drejtoria e Forcës së Posaçme Operacionale, u mundësua identifikimi i të dyshuarit, shtetasit M. Z., 29 vjeç, banues në Tiranë. Gjithashtu, u ekzekutua vendimi i Gjykatës së Shkallës së Parë të Juridiksionit të Përgjithshëm Tiranë, për kryerjen e kontrolleve në banesën e 29-vjeçarit, ku u sekuestruan në funksion të hetimit, 3 celularë dhe 1 laptop", njoftoi Policia e Shtetit.
Hetimi u mbështet nga Europol dhe u drejtua nga Policia Kriminale e Shtetit të Bavarisë (Bayerisches Landeskriminalamt) dhe Zyra Qendrore e Bavarisë për Ndjekjen Penale të Krimeve Kibernetike (ZCB). Nga prilli 2022 deri në mars 2025, në platformë ishin regjistruar gjithsej 1.8 milionë përdorues. Më 11 mars 2025, serveri që përmbante rreth 72 000 video u sekuestrua nga autoritetet gjermane dhe holandeze. Hetimi ka identifikuar pothuajse 1 400 të dyshuar në mbarë botën. Deri tani, 79 persona janë arrestuar për shpërndarjen e materialeve të abuzimit seksual të fëmijëve (CSAM). Disa nga të arrestuarit jo vetëm që ngarkonin dhe shikonin video, por edhe abuzonin me fëmijët. Hetimet vazhdojnë.
Rezultatet e Operacionit Stream
Kidflix u krijua në vitin 2021 nga një kriminel që përfitoi shuma të mëdha parash nga platforma, e cila u bë shpejt një nga më të përdorurat nga pedofilët. Sipas autoriteteve, në platformë u ngarkuan gjithsej 91 000 video unike, me një kohëzgjatje totale prej 6 288 orësh. Mesatarisht, ngarkoheshin rreth 3.5 video të reja në orë.
Ndryshe nga platformat e tjera të ngjashme, Kidflix lejonte jo vetëm shkarkimin e materialeve të abuzimit seksual të fëmijëve, por edhe transmetimin e tyre në kohë reale. Përdoruesit paguanin përmes kriptovalutave. Çdo video ngarkohej në disa versione (cilësi e ulët, mesatare dhe e lartë), duke u dhënë mundësi përdoruesve të paguanin për të parë versionet me cilësi më të mirë.
Operacioni më i madh kundër shfrytëzimit seksual të fëmijëve në historinë e Europol-it
Operacioni Stream është aksioni më i madh i organizuar ndonjëherë nga Europol në luftën kundër shfrytëzimit seksual të fëmijëve dhe një nga rastet më të rëndësishme të mbështetura nga kjo agjenci në vitet e fundit. Analistët e Qendrës Evropiane të Krimeve Kibernetike (EC3) të Europol-it dhanë mbështetje intensive operacionale, duke analizuar mijëra video dhe duke krahasuar të dhënat për të ndihmuar hetimet në vendet pjesëmarrëse.
Europol kishte një rol kyç në koordinimin e shkëmbimit të informacionit dhe veprimeve gjatë operacionit, duke forcuar bashkëpunimin ndërkufitar për të luftuar krimin e organizuar ndërkombëtar, krimin kibernetik dhe terrorizmin.
Komente
