Atë që shumë skuadra të mëdha në Itali nuk e kanë bërë këtë sezon, e bën Milani. “Djalli” i Gatusso-s në javën e 24 të “Seria A” ka mposhtur me shifrat 1-3 Atalantën në një nga transfertat më të vështira siç është ajo e Bergamos.
Në këtë takim ku nga minuta e parë për Atalantën startuan Berisha dhe Gjimshiti, pati shumë spektakël, duke filluar nga minuta e 33 kur vendasit kaluan në avantazh me Freuler. Në limitet e pjesës së parë të besuarit e Gatusso-s barazuan me fantastikun Piontek, i cili me një prekje magjike pa e parë portën barazoi shifrat.
Nuk do të kalonte shumë nga fillimi I pjesës së dytë për të parë përbysjen e “djallit”. Ishte Calhanoglu ai që realizoi një tjetër gol të bukur për Milanin, ndërkohë që për vetë futbollistin kjo ishte rrjeta e parë për këtë sezon. 6 minuta pas golit të turkut ishte sërish radha e polakut Piontek, i cili me kokë vulosi edhe fatet e këtij takimi. Një supermoment jo vetëm për Milanin, por edhe për Piontek që në 4 ndeshje radhazi aarrin të realizojë 6 gola.
Me këtë fitore Milani mban të sigurtë për momentin vendin e katërt, ndërsa I jep një goditje të fortë Atalantës e cila ka të njëjtin objektiv.
//ReportTv.al