Bayern Munich barazoi 1-1 me Manchester City-n në çerekfinalen e kthimit në Champions League. Bavarezët eliminohen kështu nga Europa, kjo pas humbjes 3-0 në sfidën e parë. Pas ndeshjes dhe pas një tjetër dështimi në stolin e gjermanëve, trajneri Thomas Tuchel e ka vendosur fajin te fati dhe vendimet e gabuara të arbitrit francez, Turpin. Pas eliminimit nga Kupa dhe formës "jo" në Bundesligë, Tuchel sheh veten që pak javë pas emërimit në stolin e kampionëve të Gjermanisë, të eliminohet edhe nga Champions League.
"Jemi ende në proces njohjeje me grupin, por puna është evidente pas çdo sfide. Fati na la në baltë përballjen e parë, e njëjta tablo ndodhi sërish në Munich. Nëse do të ishim treguar më cinikë në raste tona, tashmë mund të ishim duke festuar kualifikimin, ja që nuk ndodhi dhe duhet të reflektojmë nga skena të tilla mbi vazhdimësinë", tregoi fillimisht trajneri i Bayern.
Më pas Tuchel u ndal edhe te vendimet e arbitrit Clement Turpin, të cilat i gjykoi si të ulëta.
"E vlerësoj me notën 3, performancë e dobët në dhënien e vendimeve të nxituara, gjithsesi analiza është e kotë. Shpresoj që rruga të mos na përballë me këtë nivel të ulët gjykimi", tha Tuchel pas ndeshjes.
